وائناڈ میں پرینکا گاندھی کا پیغام، ترقیاتی منصوبوں کا افتتاح، بچوں کو زندگی کی قدر، ہمدردی اور ایمانداری سکھانے پر زور

وائناڈ: کانگریس جنرل سکریٹری اور وائناڈ سے رکن پارلیمنٹ پرینکا گاندھی نے ہفتے کے روز وائناڈ کے مختلف علاقوں میں ترقیاتی منصوبوں کا افتتاح کیا۔ دریں اثنا، انہوں نے کئی عوامی منصوبے قوم کے نام وقف کیے اور نوجوانوں کو زندگی کی قدر، ہمدردی اور دیانت داری کا پیغام دیا۔

پروگرام کا آغاز کلیپٹا کے ایم سی ایف پبلک اسکول میں نئے ایڈمنسٹریٹو بلاک کی افتتاحی تقریب سے ہوا۔ اس کے بعد انہوں نے پیایم پالی میں نئی میونسپل بلڈنگ کے سنگِ بنیاد اور میونسپل سب آفس کی تقریب میں شرکت کی۔ دوپہر 12:45 بجے وہ ملیکا، انپّرا اور نینمنی کے اسمارٹ آنگن واڑی مراکز کے افتتاح پر پہنچیں اور 2 بجے کلیپٹا کے ویتهری اسپتال میں سی-اے آر ایم مشین اور موبائل ڈسپنسری وہیکل کی حوالگی کی تقریب میں شامل ہوئیں۔

صحافیوں سے بات کرتے ہوئے پرینکا گاندھی نے احمد آباد طیارہ حادثے پر گہرے رنج کا اظہار کرتے ہوئے کہا، ’’جب پورا ملک غم میں ڈوبا ہو، تو ہمیں متحد ہوکر متاثرہ خاندانوں کے ساتھ ہمدردی کا اظہار کرنا چاہیے۔‘‘ انہوں نے امید ظاہر کی کہ تفتیشی ایجنسیاں حقائق سامنے لائیں گی اور مستقبل میں ایسے سانحات سے بچاؤ کے لیے ضروری اقدامات کیے جائیں گے۔

اسکول میں خطاب کرتے ہوئے انہوں نے حادثے کا ذکر کرتے ہوئے کہا، ’’صرف ایک شخص زندہ بچ پایا، ہمیں زندگی کی قدر کرنی چاہیے۔ اس حادثے نے ہمیں سکھایا کہ ایک لمحے میں سب کچھ ختم ہو سکتا ہے۔‘‘

انہوں نے بچوں کو مخاطب کرتے ہوئے کہا کہ زندگی کا مقصد صرف کامیابی، دولت یا عہدہ نہیں، بلکہ ایک اچھا دل، ہمدردی، دوستی اور محبت ہی اصل قدریں ہیں۔ انہوں نے کہا کہ ایم سی ایف جیسے ادارے جو پچھلے 25 برسوں سے نہ صرف تعلیم بلکہ اخلاقی تربیت بھی فراہم کر رہے ہیں، ملک کے لیے قابل فخر ہیں۔ ’’آپ نے وائناڈ لینڈ سلائیڈز کے دوران جو جذبہ دکھایا، وہ پوری قوم کے لیے مثال ہے۔‘‘

انہوں نے کہا کہ وہ اپنے بچوں کو ہمیشہ دو باتیں سکھاتی ہیں، دیانت داری اور ذمہ داری۔ دیانت داری سب سے پہلے خود سے ہونی چاہیے، تب ہی آپ دوسروں سے ایمانداری سے پیش آ سکتے ہیں۔ انہوں نے یہ بھی کہا کہ اگر کسی تعلیمی ادارے میں طلبہ کو اپنے خیالات کے اظہار کی آزادی ہو اور اساتذہ ان کی بات سنیں اور رہنمائی کریں، تو وہ ادارہ سچ میں کامیاب کہلانے کے لائق ہے۔

انہوں نے اسکول میں نئی اے آئی سہولت کی بھی تعریف کی، جس سے بچوں کو نئی سمتوں میں سیکھنے کے مواقع ملیں گے۔ انہوں نے کہا کہ آپ کے اساتذہ اور والدین نے آپ کے لیے بڑی قربانیاں دی ہیں، ان کی قدر کریں۔

خطاب کے اختتام پر پرینکا گاندھی نے کہا، ’’جب آپ اسکول چھوڑیں گے، تو شاید آپ کو اپنی زندگی کا مکمل خاکہ معلوم نہ ہو لیکن آپ کو یہ اندازہ ضرور ہو جائے گا کہ آپ کس طرح کے انسان بننا چاہتے ہیں۔ اگر اس تصور میں محبت، دیانت داری، محنت اور دوسروں کے لیے ہمدردی شامل ہو، تو آپ ایک کامیاب اور پُرمعنی زندگی گزاریں گے۔‘‘