شیواجی پارک میں بھارت جوڑو نیائے یاترا ریلی تاریخی ہوگی: نسیم خان

بھارت جوڑو نیائے یاترا کی اختتامی میٹنگ شیواجی پارک میں ہو رہی ہے اور اس میٹنگ کی تیاریاں زور وشور سے جاری ہیں۔ کانگریس پارٹی نے انڈیا الائنس کے اس جلسۂ عام کے لیے ایک رابطہ کمیٹی تشکیل دی ہے۔ ممبئی میں راہل گاندھی کا شاندار استقبال کرنے کے علاوہ، کانگریس پارٹی شیواجی پارک میں ہونے والی میٹنگ کو تاریخی بنانے کے لیے تیار ہے۔ یہ باتیں کانگریس کے کارگزار ریاستی صدرو سابق وزیر نسیم خان نے کہی ہیں۔

کانگریس کے صدر دفتر تلک بھون میں کل کوکن ڈویژن کے ضلعی صدور اور علاقائی عہدیداروں کی ایک میٹنگ منعقد کی گئی جس میں شیواجی پارک میں ہونے والی انڈیا الائنس کی میٹنگ پر تبادلہ خیال کیا گیا۔ میٹنگ کے بعد میڈیا سے بات کرتے ہوئے نسیم خان نے کہا کہ شیواجی پارک میں ہونے والی میٹنگ اور ممبئی میں راہل گاندھی کے استقبال پر تبادلہ خیال کیا گیا۔

واضح رہے کہ بھارت جوڑو نیائے یاترا کا ممبئی میں اختتام ہوگا اور انڈیا الائنس کی لوک سبھا انتخابی مہم ممبئی میں ہونے والی میٹنگ سے شروع کی جائے گی۔ انڈیا الائنس کی تمام اتحادی جماعتوں کے اہم لیڈران اس اجلاس میں شرکت کریں گے۔ نسیم خان نے یقین ظاہر کیا ہے کہ نیا ئےیاترا اور شیواجی پارک میں ہونے والے جلسہ عام کو زبردست عوامی حمایت حاصل ہوگی۔

اس میٹنگ میں آل انڈیا کانگریس کمیٹی کے رکن اور ایم پی چندرکانت ہنڈورے، آل انڈیا کانگریس کمیٹی کے سکریٹری اور شریک انچارج سونل پٹیل، اور دیگر کارکنان بڑی تعداد میں موجود تھے۔