وزیر اعظم مودی کی نیپالی ہم منصب سوشیلا کارکی سے گفتگو، امن بحالی کے لیے مکمل حمایت کی یقین دہانی

وزیر اعظم نریندر مودی نے آج نیپال کی عبوری حکومت کی وزیراعظم سوشیلا کارکی سے فون پر بات کی۔ بات چیت کے دوران وزیر اعظم نے نیپال میں ہوئے پُر تشدد مظاہروں میں جان گنوانے والے لوگوں کے تئیں گہری تعزیت کا اظہار کیا اور نیپال میں امن اور استحکام بحال کرنے کے ان کی کوششوں کے لیے ہندوستان کی پوری حمایت کی بات دہرائی۔ ساتھ انہوں نے نیپال کے یوم آئین پر سوشیلا کارکی سمیت  نیپال کے سبھی شہریوں کو دلی مبارک باد اور نیک خواہشات بھی پیش کیں۔

وزیر اعظم مودی نے سوشل میڈیا سائٹ ’ایکس‘ پر لکھا، ’’نیپال کی عبوری حکومت کی وزیر اعظم سوشیلا کارکی کے ساتھ گرمجوشی سے بات چیت ہوئی۔ حال ہی میں ہوئے افسوسناک جانی نقصان پر دلی تعزیت کا اظہار کیا اور وہاں امن اور استحکام بحال کرنے کی کوششوں کے تئیں ہندوستان کی مضبوط حمایت کی تصدیق کی۔‘‘

واضح رہے کہ نیپال میں ستمبر کی شروعات کے ساتھ ہی حکومت کے خلاف بڑے پیمانے پر مظاہرے شروع ہو گئے تھے۔ Gen-Z تحریک نے  بدعنوانی، سوشل میڈیا پر پابندی اور سرکار کی نااہلی کے خلاف سڑکوں پر اتر کر ملک گیر ہنگامہ برپا کر دیا تھا۔ 8 ستمبر سے شروع ہوئے ان مظاہروں میں پولیس کارروائی کے دوران گولی باری بھی ہوئی جس میں درجنوں نوجوان ہلاک اور سینکڑوں زخمی ہو گئے۔ اس کارروائی کے خلاف مظاہرین نے پارلیمنٹ عمارت، سرکاری دفاتر اور رہنماؤں کے گھروں پر حملہ کرکے اسے نذر آتش کرنا شروع کر دیا جس سے کاٹھمنڈو سمیت کئی شہروں میں پوری طرح بدامنی پھیل گئی۔

اس بحران کے درمیان سابق وزیر اعظم کے پی شرما اولی نے 10 ستمبر کو استعفیٰ دے دیا۔ صدر رام چندر پڈول نے آئینی التزامات کے تحت 12 ستمبر کو سپریم کورٹ کی سابق چیف جسٹس سوشیلا کارکی کو عبوری وزیر اعظم کے طور پر حلف دلایا۔ 73 سال کی سوشیلا کارکی نیپال کی پہلی خاتون وزیر اعظم ہیں، جنہیں ڈسکارڈ پلیٹ فارم پر نوجوان مظاہرین کی غیر رسمی ووٹنگ کے ذریعہ منتخب کیا گیا۔ سوشیلا کارکی کی بدعنوانی مخالف شبیہ نے انہیں عوام کا چہرہ بنا دیا۔