جاپان میں تاکائیچی کی تاریخی فتح، وزیراعظم مودی کی مبارکباد

وزیر اعظم نریندر مودی نے اتوار کو اپنی جاپانی ہم منصب سنائے تاکائیچی کو ان کی تاریخی انتخابی جیت پر مبارکباد دی اور ہندوستان-جاپان دوستی کو نئی بلندیوں تک لے جانے کے یقین کا اظہار کیا۔ وزیراعظم نے آج سوشل میڈیا پلیٹ فارم ’ایکس‘ پر لکھا کہ ’’سنائے تاکائیچی، ایوان نمائندگان کے انتخابات میں آپ کی تاریخی جیت پر مبارکباد! ہماری خصوصی حکمت عملی اور عالمی شراکت داری عالمی امن، استحکام اور خوشحالی کو فروغ دینے میں اہم کردار ادا کرتی ہے۔ مجھے یقین ہے کہ آپ کی قابل قیادت میں ہم ہندوستان-جاپان دوستی کو نئی بلندیوں تک لے جانا جاری رکھیں گے۔‘‘

وزیر اعظم مودی نے گزشتہ سال 23 نومبر کو جوہانسبرگ میں جی-20  سربراہی اجلاس کے دوران تاکائیچی کے ساتھ دوطرفہ میٹنگ کی تھی، جس میں اختراع، دفاع اور ہنر کی منتقلی جیسے شعبوں میں دو طرفہ تعاون کو تیز کرنے کے طریقوں پر تبادلہ خیال کیا گیا تھا۔ ملاقات کے بعد وزیر اعظم مودی نے ’ایکس‘ پر پوسٹ کرکے بتایا تھا کہ جاپان کی وزیر اعظم سنائے تاکائیچی کے ساتھ ایک نتیجہ خیز ملاقات ہوئی۔ ہم نے اختراع، دفاع، ہنر کی منتقلی اور دیگر شعبوں میں دوطرفہ تعاون کو تیز کرنے کے طریقوں پر تبادلہ خیال کیا۔ ہم اپنے ملکوں کے درمیان تجارتی تعلقات کو مضبوط بنانے پر بھی غور کر رہے ہیں۔ ایک بہتر منصوبے کے لیے ہندوستان-جاپان کی مضبوط شراکت داری انتہائی اہم ہے۔

جاپانی میڈیا کے ایگزٹ پولز کے مطابق لبرل ڈیموکریٹک پارٹی (ایل ڈی پی)، جس کی قیادت جاپان کی پہلی خاتون وزیر اعظم تاکائیچی کر رہی ہیں، اتوار کو ہوئے اچانک انتخابات میں اپنے دم پر سادہ اکثریت سے جیت حاصل کرنے کے لیے تیار تھیں اور اتحادیوں کے ساتھ دو تہائی اکثریت بھی حاصل کر سکتی ہیں۔ پولز کے مطابق ایل ڈی پی اپنے اتحادی جاپان انوویشن پارٹی کے ساتھ مل کر ایوانِ نمائندگان میں 366 نشستیں تک حاصل کر سکتی ہیں۔ تاکائیچی نے 23 جنوری کو ایوان زیریں کو اچانک تحلیل کردیا اور انتخابات کرائے جو 60 سالوں میں پہلی بار ہوا ہے کہ کسی پارلیمانی اجلاس کے آغاز پر ایوان کو تحلیل کیا گیا ہو۔