پاکستان کے لیے کھڑی ہونے والی ہے بڑی مشکل، سندھ ندی کے بعد ہندوستان راوی کا پانی روکنے پر کاربند

سندھ آبی معاہدہ کی معطلی کے بعد ہندوستان اب پاکستان کے لیے مزید ایک بڑا سفارتی و آبی قدم اٹھانے کی تیاریوں میں مصروف ہے۔ اطلاعات کے مطابق مرکزی حکومت راوی ندی کے اُس پانی کو بھی پاکستان جانے سے روکنے کی منصوبہ بندی کر رہی ہے جو ہندوستان کے حصے میں آتا ہے۔ اگر یہ فیصلہ عملی صورت اختیار کرتا ہے تو گرمی کے موسم میں پاکستان کو شدید آبی قلت کا سامنا کرنا پڑ سکتا ہے۔

پنجاب اور جموں و کشمیر کی سرحد پر تعمیر ہو رہا شاہپور کنڈی باندھ اب اپنے آخری مرحلے میں ہے۔ جموں و کشمیر کے وزیر جاوید احمد رانا نے اس سلسلے میں بتایا کہ سندھ آبی معاہدہ کے معطل ہونے کے بعد منصوبے کی رفتار میں نمایاں تیزی آئی ہے اور توقع ہے کہ یہ پروجیکٹ 31 مارچ تک مکمل ہو جائے گا۔ انہوں نے میڈیا سے گفتگو کرتے ہوئے کہا کہ باندھ کی تکمیل کے بعد راوی ندی کے ہندوستانی حصہ کے اضافی پانی کو پاکستان کی طرف بہنے سے روکا جا سکے گا۔ ان کے مطابق کٹھوعہ اور سانبہ اضلاع خشک سالی سے متاثر ہیں اور اس پانی کو ان علاقوں کی جانب موڑنے کی تیاری ہے۔ وزیر نے واضح کیا کہ پاکستان کو جانے والا اضافی پانی روکا جانا چاہیے کیونکہ راوی کے پانی پر ہندوستان کا حق ہے۔

شاہ پور کنڈی منصوبہ دراصل ایک طویل عرصہ سے زیر التوا پروجیکٹ ہے۔ اس کا تصور 1979 میں پیش کیا گیا تھا تاکہ راوی کے ہندوستانی حصہ کا پانی پاکستان جانے کے بجائے ملک کے اندر استعمال ہو سکے۔ 1982 میں اس وقت کی وزیر اعظم اندرا گاندھی نے اس کی بنیاد رکھی تھی، لیکن پنجاب اور جموں و کشمیر کے درمیان تنازعہ کے باعث اس کی تعمیر رک گئی۔ بعد ازاں 2008 میں اسے قومی پروجیکٹ قرار دے کر دوبارہ فعال کیا گیا۔

تقریباً 3394 کروڑ روپے کی لاگت سے بننے والا یہ باندھ 55 میٹر اونچا اور 7.7 کلومیٹر لمبا ہے۔ اس منصوبہ کے تحت پنجاب میں تقریباً 5000 ہیکٹیئر جبکہ جموں کے کٹھوعہ اور سانبہ اضلاع میں 32 ہزار ہیکٹیئر سے زائد زرعی زمین کو آبپاشی کی سہولت ملے گی۔ مالیاتی حصہ داری میں پنجاب حکومت نے 2694 کروڑ روپے جبکہ مرکزی حکومت نے 700 کروڑ روپے فراہم کیے ہیں۔

سابق وزیر آبپاشی تاج محی الدین نے بھی اس بات پر زور دیا ہے کہ سندھ آبی معاہدہ باندھ کے آپریشن کو محدود نہیں کرتی کیونکہ راوی ندی کے پانی پر ہندوستان کا مکمل اختیار ہے۔ ماہرین کا ماننا ہے کہ اگر راوی کے اضافی پانی کا بہاؤ کم ہو جاتا ہے تو پاکستان کے لیے خاص طور پر گرمیوں میں پانی کا بحران مزید سنگین ہو سکتا ہے۔ دوسری جانب ہندوستان کے سرحدی اور خشک سالی سے متاثرہ علاقوں کو اس منصوبے سے خاطر خواہ فائدہ پہنچنے کی توقع ہے۔ شاہ پور کنڈی باندھ کی تکمیل کو نہ صرف ایک تکنیکی کامیابی بلکہ ایک اہم اسٹریٹجک پیش رفت کے طور پر بھی دیکھا جا رہا ہے۔