بنگلہ دیش: ہندوستان کے سیکرٹری خارجہ کی امیر جماعت اسلامی سے ملاقات، دوطرفہ تعلقات پر گفتگو

بنگلہ دیش کے نئے وزیر اعظم طارق رحمان کی تقریب حلف برداری کے موقع پر ہندوستان کے سیکرٹری خارجہ وکرم مصری نے ڈھاکہ میں جماعت اسلامی کے امیر ڈاکٹر شفیق الرحمن سے اخلاقی ملاقات کی۔ یہ معلومات بنگلہ دیش میں ہندوستانی ہائی کمیشن نے ایک سرکاری فیس بک پوسٹ میں دی ہے۔

خارجہ سکریٹری نے ڈاکٹر رحمان کو ان کی نئی ذمہ داری کے لیے مبارکباد دی اور بنگلہ دیش کے لیے ہندوستان کی مسلسل حمایت کا اعادہ کیا۔ انہوں نے دونوں ممالک کے درمیان تعلقات کوعوام پر مبنی قرار دتے ہوئے مزید تعاون کے عزم کا اظہار کیا۔ اس موقع پر ڈاکٹر شفیق الرحمن نے دونوں ممالک کے درمیان گہرے تہذیبی تعلقات کا بھی ذکر کیا اور دوطرفہ تعلقات کو مزید مستحکم کرنے کی امید ظاہر کی۔

تقریب حلف برداری میں لوک سبھا کے اسپیکر اوم برلا نے بھی ہندوستان کی نمائندگی کی۔ انہوں نے وزیر اعظم طارق رحمان سے ملاقات کرکے وزیر اعظم نریندر مودی کی نیک خواہشات کا اظہار کیا اور ہندوستان کے دورے کی دعوت دی۔ برلا نے کہا کہ ہندوستان ایک جمہوری، ترقی پسند اور جامع ملک کی تعمیر کی کوششوں میں بنگلہ دیش کی حمایت کے لیے تیار ہے۔

ہندوستان میں بنگلہ دیش کے ہائی کمشنر ریاض حمید اللہ نے لوک سبھا اسپیکراوم برلا کے دورے کی تعریف کی۔ انہوں نے سوشل میڈیا پلیٹ فارم ’ایکس‘ پر کہا کہ دونوں رہنماؤں نے دونوں ممالک کے عوام کی فلاح و بہبود کے لیے مل کر کام کرنے پر اتفاق کیا ہے۔ وزیر اعظم نریندر مودی نے اپنے خط میں طارق رحمان کو ہندوستان آنے کی دعوت دی ہے اور ان کی اہلیہ زبیدہ رحمن اور بیٹی زائمہ کو بھی ان کے ساتھ آنے کی درخواست کی۔ خط میں انہوں نے بنگلہ دیش کی ترقی اور خوشحالی کے لیے نیک خواہشات کا اظہار کیا۔