بہار: چمکی بخار سے موت کا ایشو پھر اسمبلی میں گونجا، وزیر صحت سے استعفیٰ کا مطالبہ

بہار میں ایکیوٹ انسلائٹس سنڈروم (اے ای ایس) کا ایشو بہار اسمبلی کے مانسون اجلاس کے تیسرے دن منگل کو بھی زور و شور سے اٹھا۔ منگل کو ایوان کے باہر اور اندر اپوزیشن پارٹیوں نے وزیر صحت منگل پانڈے کے استعفیٰ کا مطالبہ کیا اور خوب ہنگامہ آرائی ہوئی۔ ہنگامے کی وجہ سے ایوان کی کارروائی دو بجے تک کے لیے ملتوی کر دی گئی۔

بہار اسمبلی کی کارروائی شروع ہونے سے قبل ایوان کے باہر سی پی آئی (ایم ایل) کے اراکین اسمبلی نے بینر-پوسٹر لے کر خوب ہنگامہ کیا اور نعرہ بازی کی۔ اس کے بعد جب ایوان کی کارروائی شروع ہوئی تو ایوان کے اندر آر جے ڈی کے اراکین نے بھی زبردست ہنگامہ کیا۔

اسمبلی اسپیکر وجے کمار چودھری نے اراکین سے ایوان کی کارروائی چلنے دینے کی گزارش کی، لیکن اراکین وزیر صحت کے استعفیٰ کا مطالبہ کرتے ہوئے ہنگامہ کرتے رہے۔ اس کے بعد اسمبلی اسپیکر نے ایوان کی کارروائی دو بجے تک کے لیے ملتوی کر دی۔

غور طلب ہے کہ اے ای ایس کے ایشو پر پیر کے روز ایوان میں وزیر صحت منگل پانڈے اور خود وزیر اعلیٰ نتیش کمار حکومت کی جانب سے جواب دے چکے ہیں۔ بہار کے وزیر اور بی جے پی لیڈر نند کشور یادو نے کہا کہ آر جے ڈی بچوں کی موت پر سیاست کر رہی ہے۔ بچوں کی موت کا سبھی لوگوں کو افسوس ہے۔ آر جے ڈی کے رکن اسمبلی بھائی ویریندر نے کہا کہ وزیر صحت کی وجہ سے ریاست کی کئی ماؤں کی گود سونی ہوئی ہے اس لیے ان کا کابینہ میں بنے رہنا مناسب نہیں ہے۔