این آرسی سے علیحدہ افراد کے بارے میں آسام حکومت کے پاس کوئی اعدادو شمار نہیں!

نیشنل سٹیزنس رجسٹر(این آر سی) کے ریاستی کوارڈی نیٹر نے ان افراد کی تفصیلات اب تک حکومت آسام کو فراہم نہیں کی ہے جن کے نام این آ رسی کی حتمی اور اپ ڈیٹ فہرست میں شامل نہیں ہیں۔ این آر سی کی یہ فہرست اس سال اگست میں شائع ہوچکی ہے۔

یہ بات وزیر داخلہ کی طرف سے پارلیمانی امور کے وزیر چندر موہن پٹواری نے اس سلسلے میں آج یہاں ریاستی اسمبلی میں پوچھے گئے ایک سوال کے جواب میں بتائی۔ وزیر اعلی کے پاس وزارت داخلہ کا قلمدان بھی ہے۔

پٹواری نے بتایا کہ ریاستی حکومت کو ان 19,06,657 افراد کے بارے میں اب تک کوئی تفصیل نہیں ملی ہے جن کے نام این آر سی کی فائنل فہرست میں نہیں ہیں۔

انہوں نے مزید کہا کہ این آر سی کے ریاستی کوآرڈی نیٹر کے دفتر سے ریاستی حکومت کو تفصیلا ت موصول ہونے کے بعد ہی ایسے حقیقی ہندوستانیوں شہریوں‘ جن کا نام شامل ہونے سے رہ گیا ہے‘ کے نام شہریوں کے رجسٹر میں شامل کرانے کے لئے اگلا قدم اٹھایا جائے گا۔

انہوں نے مزید کہا کہ حکومت این آر سی کے عمل کو مکمل کرنے کے سلسلے میں سپریم کورٹ کے حکم کو نافذ کرنے کے لئے عہد بند ہے۔