جرمنی کے 5 روزہ دورے پر راہل گاندھی نے جرمن وائس چانسلر لارس کلنگ بیل سے کی ملاقات، اہم امور پر ہوا تبادلۂ خیال

لوک سبھا میں حزب اختلاف کے قائد راہل گاندھی نے جمعہ کے روز برلن میں جرمنی کے وائس چانسلر لارس کلنگ بیل سے ملاقات کی۔ اس ملاقات کی جانکاری کانگریس نے ایک پریس نوٹ کے ذریعہ دی ہے اور ملاقات کی کچھ تصویریں سوشل میڈیا پلیٹ فارم ’ایکس‘ پر شیئر بھی کی ہیں۔ راہل گاندھی اور لارس کے درمیان ہوئی اس ملاقات کو تعمیری اور بامعنی قرار دیا جا رہا ہے۔

دی گئی جانکاری کے مطابق راہل گاندھی اور لارس کلنگ بیل کے درمیان ہوئی بات چیت کا محور وہ عالمی چیلنجز رہے جو موجودہ عالمی نظام کو شکل دے رہے ہیں۔ اس ملاقات میں ہندوستان و جرمنی کے درمیان مستقبل پر نظر رکھنے والی شراکت داری کو مضبوط بنانے کی ضرورت پر بھی غور کیا گیا۔ کانگریس کا کہنا ہے کہ دونوں لیڈران نے موسمیاتی تبدیلی، جمہوریت اور عالمی ذمہ داری جیسے اہم امور پر تبادلہ خیال کیا۔ اس دوران راہل گاندھی نے مذکورہ مسائل کا پائیدار حل تلاش کرنے کی اہمیت پر زور دیا۔ انھوں نے یہ زور بھی دیا کہ پالیسی سازی کے مرکز میں عوامی فلاح کو توجہ دی جائے۔ دوسری طرف لارس کلنگ بیل نے ماحولیاتی تحفظ اور ہندوستان کے ساتھ قریبی تعاون کے لیے جرمنی کے عزائم کو منظر عام پر لایا۔

قابل ذکر ہے کہ راہل گاندھی عالمی برادری کے ساتھ لگاتار ملاقات کر رہے ہیں اور جرمنی کے نائب چانسلر لارس کلنگ بیل سے ہوئی ملاقات بھی راہل گاندھی کی وسیع تر مصروفیات کا حصہ ہے۔ اس کا مقصد ہندوستان کے سیاسی و سماجی منطرنامے پر نقطۂ نظر کا تبادلہ کرنا ہے۔ اس وقت راہل گاندھی جرمنی کے 5 روزہ دورے پر ہیں، جہاں ان کی سابق چانسلر اولاف شولز سمیت متعدد جرمن رہنماؤں سے ملاقاتیں طے ہیں۔ وہ ہندوستانی تارکین وطن سے بھی ملاقات کریں گے۔

کانگریس نے جرمنی میں راہل گاندھی کی سرگرمیوں سے متعلق کچھ اہم جانکاریاں اپنے ’ایکس‘ ہینڈل پر شیئر کی ہیں۔ ایک میٹنگ کی کچھ تصویریں شیئر کرتے ہوئے کانگریس نے لکھا ہے کہ ’’راہل گاندھی نے تیزی سے بدلتے ہوئے عالمی منظرنامہ میں ہندوستان کے سفر پر جرمن تھنک ٹینکس کے ساتھ ایک جامع اور بامعنی گفتگو کی۔‘‘ اس پوسٹ کے ساتھ کانگریس نے عنوان لگایا ہے ’ایک بدلتی ہوئی دنیا میں ہندوستان‘۔

واضح رہے کہ ہندوستان اور جرمنی کے درمیان 2000 میں قائم ہونے والی اسٹریٹجک شراکت داری وقت کے ساتھ مسلسل وسعت اختیار کر چکی ہے۔ 2023 میں دو طرفہ تجارت 33.33 بلین امریکی ڈالر تک پہنچ گئی۔ علاوہ ازیں دونوں ممالک قابل تجدید توانائی، مصنوعی ذہانت اور دفاعی تعاون جیسے شعبوں میں مل کر کام کر رہے ہیں۔