کانگریس صدر ملکارجن کھڑگے نے اجمیر شریف درگاہ کے لیے روانہ کی چاندر، امن و خیر سگالی کا دیا پیغام

درگاہ حضرت خواجہ معین الدین چشتیؒ کا 814واں عرس مبارک جاری ہے، اور مختلف سیاسی و سماجی شخصیات کے ساتھ ساتھ عوام کی حاضری بھی دیکھنے کو مل رہی ہے۔ اس درمیان کانگریس صدر ملکارجن کھڑگے نے اجمیر شریف درگاہ کے لیے چادر روانہ کی ہے۔ اس سلسلے میں کانگریس نے اپنے ’ایکس‘ ہینڈل پر جانکاری دی ہے اور کچھ تصویریں بھی پوسٹ کی ہیں۔ اس سوشل میڈیا پوسٹ میں لکھا گیا ہے کہ ’’کانگریس صدر کھڑگے نے عرس کے مبارک موقع پر اجمیر شریف درگاہ کے لیے چادر بھیجی۔ کانگریس صدر سے چاندر لینے کے لیے اقلیتی محکمہ کے چیئرمین عمران پرتاپ گڑھی کے ساتھ ملک بھر سے آئے کانگریس لیڈران کھڑگے کی رہائش پر پہنچے تھے۔‘‘ اس میں مزید لکھا گیا ہے کہ ’’اقلیتی محکمہ کا نمائندہ وفد آئندہ دنوں میں درگاہ مبارک پر چادر پیش کرے گا۔‘‘

کانگریس صدر کھڑگے نے اپنے آفیشیل ’ایکس‘ ہینڈل پر خواجہ غریب نوازؒ کی تعلیمات کا ذکر کرتے ہوئے ملک میں محبت و بھائی چارہ کا پیغام عام کیا ہے۔ انھوں نے اپنی پوسٹ میں لکھا ہے کہ ’’درگاہ حضرت خواجہ معین الدین چشتیؒ اجمیر شریف کے 814ویں عرس مبارک پر میں اپنی اور پوری کانگریس پارٹی کی طرف سے خواجہ کی بارگاہ میں چادر پیش کرتے ہوئے خود کو خوش قسمت مانتا ہوں۔‘‘ وہ آگے لکھتے ہیں کہ ’’خواجہ غریب نوازؒ کی تعلیم ’محبت سب کے لیے، نفرت کسی سے نہیں‘ آج کے دور میں زیادہ موزوں ہے۔ گنگا-جمنی تہذیب، بھائی چارہ، جمہوریت اور آئین کی حفاظت ہی ہندوستان کی اصل طاقت ہے۔ اس مبارک موقع پر دعا ہے کہ ہمارے ملک میں امن، محبت، سماجی خیر سگالی اور اتحاد ہمیشہ قائم رہے۔‘‘

کانگریس اقلیتی محکمہ کے چیئرمین عمران پرتاپ گڑھی نے بھی کانگریس صدر کے ذریعہ درگاہ اجمیر شریف کے لیے چادر روانہ کیے جانے کی اطلاع ’ایکس‘ ہینڈل پر دی ہے۔ انھوں نے لکھا ہے کہ ’’امن، محبت، بھائی چارہ کے پیغام کے ساتھ کانگریس صدر ملکارجن کھڑگے جی نے آج اجمیر شریف درگاہ کے عرس مبارک کے موقع پر عقیدت کی چادر روانہ کی۔ کانگریس صدر سے چادر لینے کے لیے کانگریس اقلیتی ڈپارٹمنٹ کی دعوت پر ملک کی تقریباً ہر ریاست کے کانگریس نمائندے آج دہلی پہنچے۔‘‘ انھوں نے مزید لکھا کہ ’’اقلیتی محکمہ کا نمائندہ وفد آئندہ دنوں میں درگاہ مبارک پر چادر پیش کرے گا۔‘‘