جی ایس ٹی قانون نفاذ کے 5 سال مکمل، کانگریس نے مودی حکومت کو دکھایا آئینہ

کانگریس نے جی ایس ٹی (گڈس اینڈ سروسز ٹیکس) نافذ کیے جانے کے پانچ سال مکمل ہونے پر جشن منا رہی مودی حکومت کو آئینہ دکھاتے ہوئے الزام عائد کیا ہے کہ جی ایس ٹی قانون اور اس کے عمل درآمد کے طریقے نے ملک کی معیشت کو برباد کر دیا۔ کانگریس لیڈر پی چدمبرم نے حکومت سے جی ایس ٹی قانون پر بحث کےل یے کل جماعتی میٹنگ بلانے اور پارلیمنٹ میں بھی اس پر بحث کرانے کا مطالبہ کیا ہے۔

کانگریس کے سینئر لیڈر اور سابق مرکزی وزیر مالیات پی چدمبرم نے اس موقع پر کہا کہ کانگریس اس جی ایس ٹی کو خارج کرتی ہے اور وہ موجودہ جی ایس ٹی کی جگہ ’جی ایس ٹی 2.0‘ کو لانے کی سمت میں کام کرے گی۔ انھوں نےم زید کہا کہ ’’آج جی ایس ٹی اپنا پانچواں یوم پیدائش منا رہا ہے۔ درحقیقت اس میں جشن منانے جیسا کچھ بھی نہیں ہے۔ جی ایس ٹی میں کچھ پیدائشی خامیاں تھیں اور گزشتہ پانچ سالوں میں یہ خامیاں بدتر ہو گئی ہیں اور اس کی وجہ سے اس نے اپنے حلقہ اختیار میں آنے والے سبھی لوگوں کو سنگین نقصان پہنچایا ہے۔‘‘

چدمبرم نے دعویٰ کیا کہ اس نے جی ایس ٹی کا استعمال کرنے والے عام لوگوں، جو زیادہ ٹیکس کی مار برداشت کر رہے ہیں، انھیں اپنے بوجھ تلے دبا دیا ہے۔ یہ قانون اتنا خامیوں بھرا ہے کہ حکومت کو سینکڑوں ضمنی احکامات جاری کرنے کے لیے مجبور ہونا پڑا ہے۔ گزشتہ پانچ سال میں حکومت نے 869 نوٹیفکیشن، 143 سرکلرس اور 38 آرڈرس جاری کیے ہیں۔ یہ ایک ایسی جی ایس ٹی ہے جو خامیوں سے بھرا اور پوری طرح غیر مستحکم ہے۔‘‘

پی چدمبرم نے دعویٰ کیا کہ جی ایس ٹی کے ضمن میں ریاستوں کے ساتھ دھوکہ کیا گیا ہے۔ کانگریس لیڈر نے یہ بھی کہا کہ جی ایس ٹی کونسل ناکارہ ہے اور ریاستوں کے وزیر مالیات اس سے ناخوش ہیں۔ کانگریس جنرل سکریٹری جئے رام رمیش نے اس موقع پر کہا کہ اس پر (جی ایس ٹی قانون پر) پارلیمنٹ میں بحث کرائی جائے اور کل جماعتی میٹنگ بلا کر بھی تبادلہ خیال کیا جائے۔