آلودہ پانی سے 21 اموات کے بعد بیدار ہوئی مدھیہ پردیش حکومت، ریاست بھر میں’ پانی سنوائی‘ منعقد کرنے کا فیصلہ

 اندورکے بھاگیرتھ پورہ میں21 اموات کے بعد آخر کارمدھیہ پردیش کی موہن حکومت بیدار ہوتی نظر آرہی ہے۔ آلودہ پانی کی وجہ سے بڑے پیمانے پرانسانی جانوں کے ضیاع پرجاری تنقید کے دوران ریاستی حکومت نے بڑا اعلان کیا ہے۔ جس کے بعد اب ریاست میں ہر منگل کو ’پانی سنوائی‘ ہوگی۔ ہفتہ کو منعقدہ ایک اعلیٰ سطحی میٹنگ کے دوران وزیراعلیٰ موہن یادو نے کہا کہ آلودہ پانی کی سپلائی کسی بھی قیمت پر برداشت نہیں کی جائے گی۔

میٹنگ میں یہ بھی اعلان کیا گیا کہ شہری اور دیہی علاقوں میں پانی کے ٹینکوں اور ٹریٹمنٹ آلات کی نگرانی اور صفائی کے لیے ’صاف پانی مہم‘ شروع کی جائے گی۔ اس مہم کا پہلا مرحلہ 10 جنوری سے 28 فروری تک ہوگا۔ دوسرا مرحلہ یکم مارچ سے 31 مئی تک چلے گا۔

مہم کے تحت تمام پانی صاف کرنے والے پلانٹس اور پینے کے پانی کی ٹینکیوں کو صاف کیا جائے گا۔ جی آئی ایس میپ پر مبنی ایپ سے نگرانی ہوگی۔ اس کے ساتھ ہی پانی اور سیوریج کی پائپ لائنوں کی بھی میپنگ کی جائے گی۔ اس کے علاوہ انٹر کنکشن پوائنٹس کی نشاندہی کی جائے گی اور لیکیج کو اچھی طرح چیک کیا جائے گا۔