کرناٹک: کانگریس کے عشائیہ میں 3 بی جے پی اراکین اسمبلی کی شرکت کے بعد سیاسی ہلچل شروع

کرناٹک میں ایک نئی سیاسی ہلچل شروع ہو گئی ہے جو بی جے پی کے لیے پریشان کرنے والی ہے۔ دراصل کانگریس قانون ساز پارٹی کی میٹنگ کے بعد بدھ کی شب عشائیہ کا نظم تھا جس میں بی جے پی کے تین اراکین اسمبلی کی شرکت ہوئی۔ اس خبر کے پھیلتے ہی کرناٹک میں سیاسی ہلچل بڑھ گئی اور کرناٹک بی جے پی صدر بی وائی وجیندر کا بیان بھی منظر عام پر آیا۔ انھوں نے کانگریس کے عشائیہ میں اپنے تین اراکین اسمبلی کے شامل ہونے کو سنگین معاملہ قرار دیا ہے۔ صحافیوں سے بات چیت کرتے ہوئے انھوں نے کہا کہ وہ ان اراکین اسمبلی سے وضاحت مانگیں گے جو کانگریس کے عشائیہ میں شامل ہوئے تھے۔

اس معاملے میں کانگریس کے ریاستی صدر اور کرناٹک کے نائب وزیر اعلیٰ ڈی کے شیوکمار کا بھی رد عمل سامنے آیا ہے۔ انھوں نے اپنے بیان میں کہا ہے کہ بی جے پی اراکین اسمبلی نے کانگریس قانون ساز پارٹی کی میٹنگ میں حصہ نہیں لیا تھا، وہ ان کی دعوت پر بدھ کی شب صرف عشائیہ میں ہی شامل ہوئے تھے۔ وہ کانگریس قانون ساز پارٹی کی میٹنگ میں آخر کیوں آئیں گے، وہ ہماری پارٹی کے رکن اسمبلی ہیں ہی نہیں۔

میڈیا رپورٹس کے مطابق بی جے پی اراکین اسمبلی ایم ٹی سوم شیکھر، شیورام ہبار اور ایچ وشوناتھ کانگریس کے عشائیہ میں شامل ہوئے تھے۔ اس کے بعد سے کرناٹک کی سیاست میں ہلچل تیز ہو گئی ہے۔ سیاسی گلیاروں میں چہ می گوئیاں شروع ہو گئی ہیں اور امکان ظاہر کیا جا رہا ہے کہ 2024 لوک سبھا انتخاب سے قبل یہ سبھی کانگریس میں شامل ہو سکتے ہیں۔