جموں و کشمیر: وزیر اعلیٰ عمر عبداللہ کو نقش بند صاحب میں فاتحہ پڑھنے سے نہیں روک پائی پولیس، ہاتھا پائی کی ویڈیو جاری

جموں و کشمیر میں ’یومِ شہید‘ سے متعلق شروع ہوا تنازعہ ختم ہوتا ہوا دکھائی نہیں دے رہا ہے۔ انتظامیہ نے کئی لیڈران کو نظربند کر دیا ہے اور کئی لیڈران گرفتار کیے گئے ہیں۔ اب خبریں سامنے آ رہی ہیں کہ جموں و کشمیر کے وزیر اعلیٰ عمر عبداللہ کو مبینہ طور پر فاتحہ پڑھنے سے روکا گیا تھا۔ حالانکہ وہ روکے جانے کے باوجود مزارِ شہدا کی چہاردیواری پھاند کر فاتحہ پڑھنے چلے گئے۔ اس دوران ان کی اور پولیس اہلکاروں کے درمیان تصادم بھی ہو گیا۔

وزیر اعلیٰ عمر عبداللہ نے الزام عائد کیا ہے کہ انھیں پولیس کی طرف سے جسمانی طور سے اذیت پہنچائی گئی۔ انھوں نے کہا کہ ’’میں پرعزم تھا اور رکنے والا نہیں تھا۔ میں کوئی غیر قانونی کام نہیں کر رہا تھا۔ ان ’قانون کے محافظوں‘ کو یہ واضح کرنا ہوگا کہ کس قانون کے تحت انھوں نے فاتحہ پڑھنے سے ہمیں روکنے کی کوشش کی۔‘‘ وہ مزید کہتے ہیں کہ ’’یہ واقعہ پولیس کی منمانی اور مذہبی آزادی کی خلاف ورزی کی ایک واضح مثال ہے۔ یہ تجربہ بہت ہی تکلیف دہ اور مایوس کن رہا ہے۔‘‘

عمر عبداللہ نے پولیس پر ہاتھا پائی کرنے کا سنگین الزام بھی عائد کیا۔ انھوں نے سوشل میڈیا پلیٹ فارم ’ایکس‘ پر ایک ویڈیو شیئر کی ہے، جس میں وزیر اعلیٰ کو پولیس روکنے کی کوشش کرتی ہوئی نظر آ رہی ہے۔ عمر عبداللہ نے کہا کہ ’’بڑے افسوس کی بات ہے کہ وہ لوگ جو خود اس بات کا دعویٰ کرتے ہیں کہ ان کی ذمہ داری صرف سیکورٹی اور لاء اینڈ آرڈر ہے، لیکن ہمیں یہاں آ کر فاتحہ کرنے کی اجازت نہیں دی گئی۔ سبھی کو گھروں میں بند رکھا گیا۔ یہاں تک کہ جب دروازہ کھلنے شروع ہوئے تو میں نے کنٹرول روم کو بتایا کہ میں یہاں آنا چاہتا ہوں، تو منٹوں کے اندر میرے دروازے کے باہر بنکر لگا دیا گیا۔ رات کو بارہ ایک بجے تک اس کو ہٹایا نہیں گیا۔ آج میں نے ان کو بتایا ہی نہیں، میں بغیر بتائے گاڑی میں بیٹھا۔ ان کی بے شرمی دیکھیے، آج بھی ہمیں روکنے کی کوشش کی۔‘‘

وزیر اعلیٰ عمر عبداللہ نے موجودہ حالات پر فکر ظاہر کرتے ہوئے کہا کہ ’’میں جاننا چاہتا ہوں کہ کس قانون کے تحت مجھے روکا گیا۔ یہ ایک آزاد ملک ہے، لیکن وہ سوچتے ہیں کہ ہم ان کے غلام ہیں۔ ہم کسی کے غلام نہیں ہیں۔ ہم صرف یہاں کے لوگوں کے غلام ہیں۔ ہم نے ان کی کوششوں کو ناکام کر دیا۔‘‘ وہ مزید کہتے ہیں کہ ’’انھوں نے ہمارا پرچم پھاڑنے کی کوشش کی، لیکن ہم یہاں آئے اور فاتحہ پڑھا۔ وہ بھول جاتے ہیں کہ ی قبریں ہمیشہ یہیں رہیں گی۔ انھوں نے ہمیں 13 جولائی کو روکا تھا، لیکن وہ کب تک ایسا کرتے رہیں گے؟ ہم جب چاہیں یہاں آئیں گے اور شہیدوں کو یاد کریں گے۔‘‘