ٹرمپ اور پاکستان کی قربت پر جئے رام رمیش کا اظہارِ تشویش، مودی حکومت کی خاموشی پر سخت سوال

نئی دہلی: کانگریس کے سینئر رہنما جئے رام رمیش نے امریکہ کے صدر ڈونلڈ ٹرمپ اور پاکستان کے فیلڈ مارشل عاصم منیر کے درمیان بڑھتی قربت پر گہری تشویش ظاہر کی ہے۔ انہوں نے سوشل میڈیا پلیٹ فارم ایکس پر جاری ایک تفصیلی پوسٹ میں کہا کہ صدر ٹرمپ کا پاکستان کی فوجی قیادت، خاص طور پر عاصم منیر کے تئیں جھکاؤ مسلسل بڑھتا جا رہا ہے، جو ہندوستان کے لیے نہایت تشویشناک اور فکرمند کرنے والی پیش رفت ہے۔

جئے رام رمیش کے مطابق عاصم منیر کے اشتعال انگیز اور فرقہ وارانہ طور پر زہریلے بیانات نے 22 اپریل 2025 کو پہلگام میں ہوئے دہشت گردانہ حملے کے لیے ماحول تیار کیا۔ ان کا کہنا ہے کہ ایسے شخص کی عالمی سطح پر ستائش نہ صرف افسوسناک ہے بلکہ یہ پاکستان کو دہشت گردی کے معاملے میں بالواسطہ طور پر بری الذمہ قرار دینے کے مترادف ہے۔

انہوں نے اپنی پوسٹ میں یاد دلایا کہ 18 جون 2025 کو صدر ٹرمپ نے وائٹ ہاؤس میں فیلڈ مارشل عاصم منیر کو غیر معمولی طور پر ظہرانے پر مدعو کیا۔ اس کے بعد یکم اکتوبر 2025 کو دونوں کی دوسری ملاقات وائٹ ہاؤس میں ہوئی، جہاں عاصم منیر نے صدر ٹرمپ کو ریئر ارتھ معدنیات کا ایک ڈبہ بطور تحفہ پیش کیا۔

جئے رام رمیش کے مطابق 13 اکتوبر کو مصر میں صدر ٹرمپ نے عاصم منیر کو اپنا پسندیدہ فیلڈ مارشل قرار دیا، جبکہ 29 اکتوبر کو انہیں ایک عظیم لڑاکا کہا گیا۔ کانگریس رہنما نے کہا کہ 22 دسمبر کو بھی صدر ٹرمپ نے عاصم منیر کی تعریف کرتے ہوئے انہیں نہایت معزز جنرل قرار دیا، جو اس بات کا ثبوت ہے کہ امریکہ اور پاکستان کے درمیان عسکری اور سفارتی تعلقات میں غیر معمولی گرمجوشی آ رہی ہے۔ ان کے مطابق یہ قربت نہ صرف خطے کے امن بلکہ ہندوستان کی قومی سلامتی کے لیے بھی سنجیدہ تشویش کا باعث ہے۔

جئے رام رمیش نے اس پورے معاملے پر مودی حکومت کی خاموشی کو انتہائی پریشان کن قرار دیا۔ ان کا کہنا تھا کہ یہ محض خارجہ پالیسی کا سوال نہیں بلکہ قومی تشویش کا معاملہ ہے، مگر حکومت ہند کی جانب سے اس پر کوئی واضح یا مضبوط موقف سامنے نہیں آیا۔ انہوں نے 26 نومبر کے ممبئی حملوں کے بعد کی صورتحال کی یاد دہانی کراتے ہوئے کہا کہ اس وقت عالمی سطح پر پاکستان کو مکمل طور پر بے نقاب اور تنہا کر دیا گیا تھا، جبکہ آج اسی پاکستان اور اس کی فوجی قیادت کی تعریف کی جا رہی ہے، جو ہندوستان کے لیے خطرناک اشارہ ہے۔