دہلی سے لیہ جا رہی انڈیگو کی پرواز تکنیکی خرابی کے باعث واپس لوٹی، تمام مسافر محفوظ

نئی دہلی: دہلی سے لیہ جانے والی انڈیگو ایئرلائنز کی پرواز 6ای 2006 کو جمعرات کی صبح اس وقت دہلی واپس لانا پڑا جب پرواز کے دوران تکنیکی خرابی کی اطلاع ملی۔ یہ پرواز صبح ساڑھے چھ بجے دہلی کے اندرا گاندھی انٹرنیشنل ایئرپورٹ سے روانہ ہوئی تھی اور اس کی منزل لیہ کا کشوک بَقُولا رِمپوچے ایئرپورٹ (آئی ایکس ایل) تھی۔

ذرائع کے مطابق پرواز کا آغاز معمول کے مطابق ہوا، تاہم لیہ کے قریب پہنچنے سے کچھ وقت قبل طیارے میں تکنیکی خرابی محسوس کی گئی۔ پائلٹ نے فوری طور پر حالات کا جائزہ لیا اور حفاظتی اقدامات کے تحت دہلی واپسی کا فیصلہ کیا۔ طیارے نے دہلی ایئرپورٹ پر بحفاظت لینڈنگ کی، جہاں تمام 180 مسافروں اور عملے کو بحفاظت طیارے سے باہر نکال لیا گیا۔

ابتدائی رپورٹوں کے مطابق، طیارے میں کسی قسم کی ایمرجنسی کا اعلان نہیں کیا گیا تھا، تاہم احتیاطی تدابیر کے طور پر اسے واپس لانا مناسب سمجھا گیا۔

انڈیگو ایئرلائنز نے اس واقعے کے بعد ایک مختصر بیان جاری کرتے ہوئے کہا ہے کہ پرواز کے دوران کوئی ایمرجنسی ڈکلیئر نہیں کی گئی تھی اور تمام حفاظتی اقدامات پر عمل کیا گیا۔ ایئرلائن نے یہ بھی کہا کہ وہ جلد ہی اس واقعے کے حوالے سے تفصیلی بیان جاری کرے گی۔

آخری اطلاع موصول ہونے تک انڈیگو نے طیارے کی واپسی اور تکنیکی خرابی کی نوعیت کے بارے میں کوئی وضاحت پیش نہیں کی تھی۔ مسافروں کو متبادل پرواز کے ذریعے ان کی منزل تک پہنچانے کے لیے بھی انتظامات کیے جا رہے تھے۔

یاد رہے کہ لیہ جیسے دشوار گزار علاقے میں ایوی ایشن سروسز موسم اور تکنیکی پیچیدگیوں کے باعث اکثر متاثر ہوتی رہتی ہیں۔ تاہم، اس طرح کے فوری ردعمل سے ایک بڑا حادثہ رونما ہونے سے بچا لیا گیا۔