ہندوستان بن رہا ہے مصنوعی ذہانت کی نئی عالمی طاقت

ہندوستان کی ترقی میں مصنوعی ذہانت (اے آئی) ایک مرکزی ستون بن کر ابھر رہا ہے، جو نہ صرف گورننس اور عوامی خدمات کو بہتر بنا رہی ہے بلکہ بڑے پیمانے پر شہریوں کے مسائل کا حل بھی فراہم کر رہا ہے۔ انسانی ترقی کی تاریخ میں بجلی، کمپیوٹر، انٹرنیٹ اور موبائل فونز نے جس طرح انقلابات برپا کیے، اب اے آئی اسی تسلسل کو آگے بڑھاتے ہوئے زراعت، صحت، تعلیم اور ماحولیات جیسے شعبوں میں انسانوں کے ساتھ مل کر کام کر رہی ہے۔

اسی وژن کو تقویت دینے کے لیے، 16 سے 20 فروری 2026 تک نئی دہلی کے بھارت منڈپم میں 'انڈیا–اے آئی امپیکٹ سمٹ' منعقد کیا جا رہاہے۔ یہ 'گلوبل ساؤتھ' میں منعقد ہونے والا پہلا عالمی اے آئی سمٹ ہے، جس میں 15 سے 20 سربراہانِ مملکت، 50 سے زائد بین الاقوامی وزراء اور 100 سے زیادہ عالمی سی ای اوز شرکت کر رہے ہیں۔ اس سمٹ کا مقصد اے آئی کی طاقت کو جامع ترقی اور پائیدار مستقبل کے لیے استعمال کرنا ہے۔

ہندوستان کی مکمل توجہ اے آئی کی عملی تعیناتی پر ہے تاکہ یہ عام شہری کی زندگی کو آسان بنا سکے۔ 'کسان ای مترا' اور 'نیشنل پیسٹ سرویلنس سسٹم' جیسے پلیٹ فارمز کے ذریعے کسانوں کو موسم کی پیشن گوئی اور فصلوں کے تحفظ میں مدد مل رہی ہے۔اے آئی کے ذریعے بیماریوں کی جلد تشخیص اور ٹیلی میڈیسن کی سہولیات دیہی علاقوں تک پہنچائی جا رہی ہیں۔

ہندوستان کا ماننا ہے کہ اے آئی کی کامیابی اس کے استعمال کو سب کے لیے دستیاب کرانے میں ہے، یعنی اس کے ثمرات ہر خاص و عام تک پہنچیں۔ اس مقصد کے لیے حکومت نے کئی اہم اقدامات کیے ہیں۔ صحت، زراعت اور پائیدار شہروں کے لیے مہارت کے مراکز قائم کیے گئے ہیں، جبکہ بجٹ 2025 میں تعلیم کے لیے چوتھے مرکز کا اعلان کیا گیا۔ جولائی 2025 میں اسکلنگ فار اے آئی ریڈینس (ایس او اے آر) پروگرام شروع کیا گیا جو چھٹی سے بارہویں جماعت کے طلبہ اور اساتذہ کو اے آئی کے اخلاقی استعمال کی تربیت دیتا ہے۔ نومبر 2022 میں شروع ہونے والا 'YUVAi' پروگرام طلبہ کو 8 مختلف شعبوں میں اے آئی کے اطلاق کے قابل بنا رہا ہے۔ اس کے علاوہ آئی ٹی آئی کے ذریعے 31 نئے دور کے کورسز متعارف کرائے گئے ہیں۔ 'انڈیا اے آئی مشن' کے تحت 500 پی ایچ ڈی، 5000 پوسٹ گریجویٹ اور 8000 انڈر گریجویٹ طلبہ کو تعاون فراہم کیا جا رہا ہے۔ ٹیئر 2 اور ٹیئر 3 شہروں میں 31 ڈیٹا اور اے آئی لیبارٹریز قائم کی جا چکی ہیں۔

سمٹ کے دوران 'چکر' (ورکنگ گروپس) کے ذریعے مختلف موضوعات پر بحث کی جا رہی ہے۔ خاص طور پر 'ڈیموکریٹائزنگ اے آئی ریسورسز ورکنگ گروپ'، جس کی مشترکہ صدارت ہندوستان، مصر اور کینیا کر رہے ہیں، اس بات کو یقینی بنانے کے لیے کوشاں ہے کہ کمپیوٹ اور ڈیٹا جیسے وسائل تک تمام ممالک کی رسائی سستی اور منصفانہ ہو۔

نئی دہلی سے اٹھنے والی یہ لہر پورے گلوبل ساؤتھ کے لیے امید کی ایک نئی کرن ہے۔ ہندوستان نے یہ ثابت کر دیا ہے کہ 'ڈیجیٹل انڈیا' سے 'مصنوعی ذہانت' تک کا سفر صرف اعداد و شمار کا کھیل نہیں، بلکہ کسان کے کھیت سے لے کر طالب علم کے لیپ ٹاپ تک پہنچنے والا انقلاب ہے۔ یہ سمٹ اس عہد کی تجدید ہے کہ مستقبل کی ٹیکنالوجی صرف طاقتور ممالک کے لیے نہیں ہوگی، بلکہ یہ ہر اس قوم کا ہتھیار بنے گی جو پائیدار ترقی اور مساوات پر یقین رکھتی ہے۔