اندور آلودہ پانی کا معاملہ: بی جے پی ووٹ چوری سے اقتدار میں آتی ہے اور عوام کو موت بانٹتی ہے، جیتو پٹواری کا حملہ

اندور کے بھاگیرتھ پورہ علاقے میں آلودہ پانی پینے سے ہونے والی اموات کے معاملے پر کانگریس نے بھارتیہ جنتا پارٹی پر شدید حملہ بولا ہے۔ مدھیہ پردیش کانگریس کے صدر جیتو پٹواری نے الزام عائد کیا ہے کہ بی جے پی ووٹ چوری کے ذریعے اقتدار میں آتی ہے اور اس کے نتیجے میں عوام کو بنیادی سہولتوں کے بجائے موت بانٹی جا رہی ہے۔ انہوں نے کہا کہ اندور جیسے بڑے اور تجارتی شہر میں صاف پانی کی فراہمی میں ناکامی ریاستی حکومت کی سنگین لاپرواہی کو ظاہر کرتی ہے۔

جیتو پٹواری کے مطابق بھاگیرتھ پورہ میں آلودہ پانی پینے سے بڑی تعداد میں لوگ بیمار ہوئے اور کئی افراد کی جان چلی گئی۔ سرکاری طور پر اموات کی تعداد چار بتائی جا رہی ہے، جبکہ اپوزیشن کا دعویٰ ہے کہ مرنے والوں کی تعداد دس سے زیادہ ہے۔ پٹواری نے الزام لگایا کہ حکومت اصل تعداد کو چھپا رہی ہے تاکہ انتظامی ناکامیوں پر پردہ ڈالا جا سکے۔

کانگریس صدر نے چھندواڑہ میں زہریلا کھانسی کا شربت پینے سے بچوں کی موت کا حوالہ دیتے ہوئے کہا کہ اس واقعے میں بھی ذمہ داروں کو سزا نہیں ملی۔ ان کے مطابق جب بچوں کی جان بچانے والی دوا ہی جان لے لے اور کسی پر کارروائی نہ ہو تو یہی پیغام جاتا ہے کہ نظام میں جواب دہی ختم ہو چکی ہے۔ پٹواری نے کہا کہ اندور کا معاملہ بھی اسی سلسلے کی ایک کڑی ہے۔

جیتو پٹواری نے مطالبہ کیا کہ اس معاملے میں متعلقہ افسران کے خلاف غیر ارادی قتل کا مقدمہ درج کیا جائے اور شہری انتظامیہ کے وزیر کیلاش وجے ورگیہ کو عہدے سے ہٹایا جائے۔ انہوں نے کہا کہ اندور میں بی جے پی کے نو ایم ایل اے، ایک رکن پارلیمان اور میئر موجود ہیں، اس کے باوجود اگر شہریوں کو زہریلا پانی مل رہا ہے تو یہ اجتماعی ناکامی ہے۔

دوسری جانب ریاستی حکومت نے معاملے کو سنجیدگی سے لیتے ہوئے کارروائی کی ہے۔ وزیر اعلیٰ موہن یادو متاثرہ خاندانوں سے ملے، مالی امداد کا اعلان کیا اور بیماروں کے بہتر علاج کی ہدایت دی۔ حکومت کی جانب سے تین افسران کے خلاف کارروائی بھی کی گئی ہے اور واقعے کی جانچ کے لیے ایک کمیٹی تشکیل دی گئی ہے۔