کشمیر: محرم کے جلوس میں لگا 'آزادی' کا نعرہ، مقدمہ درج، 2 گرفتار

سری نگر: جموں و کشمیر پولس نے سری نگر کے ایک مضافاتی علاقے میں محرم کے ایک جلوس کے دوران آزادی کے حق میں نعرے لگانے والے نوجوانوں کے خلاف مقدمہ درج کر کے دو کو گرفتار کر لیا ہے۔ یہ مقدمہ غیر قانونی سرگرمیوں کی روک تھام والے قانون اور تعزیرات ہند کی دفعات 143، 188 اور 269 کے تحت پولس تھانہ پارمپورہ میں درج کیا گیا ہے اور اس میں تین نوجوانوں کو نامزد کیا گیا ہے۔

پولس کی جانب سے جاری ایک بیان میں کہا گیا ہے کہ سوشل میڈیا پر ایک ویڈیو نمودار ہوئی جس میں ایک جلوس عزا میں عزاداروں کو آزادی حامی نعرے لگاتے ہوئے دیکھا جاسکتا ہے۔ اس میں کہا گیا ہے کہ "پولس تھانہ پارمپورہ نے معاملے کا نوٹس لیا۔ تیزی سے کارروائی کرتے ہوئے اس جگہ کی نشاندہی کی جو ہوکرسر نوپورہ بنڈ کے آخر میں اور ہوکرسر روڈ کے ڈھائی کلو میٹر اندر واقع ہے۔"

پولس بیان میں مزید کہا گیا ہے کہ یہ علاقہ الگ تھلگ ہے اور اس کی اس سے پہلے اس طرح کے کسی 'غیر قانونی' اجتماع کے انعقاد کی کوئی تاریخ نہیں ہے۔ اس میں یہ بھی کہا گیا ہے کہ "نہ علاقے میں کسی جلسے یا جلوس کی کوئی اطلاع تھی اور نہ ہی وہاں پر پولس کی موجودگی تھی۔ یہ جگہ امام بارہ سے کافی دور ہے۔"

پولس بیان کے مطابق یہ انکشاف ہوا ہے کہ بڈگام کے ملحقہ علاقے سے کچھ لڑکے سجاد حسین پرے ولد محمد یوسف پرے ساکنہ نائوپورہ گنڈ ہسی بٹ، عارف احمد ڈار ولد محمد اکبر ڈار ساکنہ گنڈ ہسی بٹ نزدیک جے اینڈ کے بینک اور راجا محبوب ولد محبوب حسین ساکنہ گنڈ حسی بٹ کی قیادت میں یہاں جمع ہوئے اور آزادی حامی نعرے لگائے۔ اس میں مزید کہا گیا کہ "اس سلسلے میں مذکورہ ملزمان کے خلاف ایف آئی آر زیر نمبر 177 آف 2020 درج کی گئی ہے۔ یہ ایف آئی آر غیر قانونی سرگرمیوں کی روک تھام والے قانون کی دفعہ 13 اور تعزیرات ہند کی دفعات 143، 188 اور 269 کے تحت درج کی گئی ہے۔" پولس کا کہنا ہے کہ آدھی رات کو مارے گئے چھاپوں کے دوران دو افراد کو مذکورہ مقدمے میں گرفتار کیا گیا ہے جبکہ مزید گرفتاریاں متوقع ہیں۔ اس میں مزید کہا گیا ہے کہ تفتیش جاری ہے۔