لکھنؤ کے لوک بندھو اسپتال کے آئی سی یو سمیت تین وارڈوں میں آگ لگی، تمام مریض محفوظ

لکھنؤ کے لوک بندھو اسپتال میں پیر کو اچانک آگ لگ گئی، جس سے اسپتال میں خوف و ہراس پھیل گیا۔ ہسپتال میں سینکڑوں مریض داخل تھے جنہیں ریسکیو کر کے قریبی اسپتالوں میں منتقل کر دیا گیا ہے۔ فی الحال آگ پر قابو پالیا گیا ہے اور آگ لگنے کی وجہ کا پتہ لگایا جا رہا ہے۔

نیوز پورٹل ’آج تک‘ پر شائع خبر کے مطابق لکھنؤ کے ڈی ایم نے  کہا، 'لوک بندھو اسپتال میں آگ لگنے کی اطلاع ملتے ہی ہم نے فائر اینڈ ریسکیو ڈیپارٹمنٹ کی ایک ٹیم کو موقع پر بھیجا۔ انہوں نے ریسکیو آپریشن شروع کر دیا۔ آگ سے آئی سی یو، خواتین کا ایک وارڈ اورایک  دوسرا وارڈ متاثر ہوا۔ تمام مریضوں کو ان وارڈز سے بچا لیا گیا ہے۔ انہیں تین اسپتالوں میں ریفر کیا گیا ہے۔ صورتحال قابو میں ہے۔‘

معلومات کے مطابق آگ اسپتال کی دوسری منزل پر لگی۔ مریضوں کو بحفاظت باہر نکال لیا گیا ہے۔ فائر بریگیڈ کی پانچ گاڑیوں نے موقع پر پہنچ کر آگ پر قابو پالیا۔ ابھی تک کسی جانی نقصان کی کوئی خبر نہیں ہے۔ آگ کے شعلے بہت بڑے اور بھیانک تھے جس کی وجہ سے صورتحال سنگین ہوگئی۔

آگ لگنے سے اسپتال دھویں سے بھر گیا اور مریضوں اور ان کے لواحقین کو جلد بازی میں نکالا گیا۔ ڈی سی پی سمیت پولیس کی بھاری نفری موقع پر موجود ہے۔ خبر ہے کے وزیر اعلیٰ  یوگی آدتیہ ناتھ نے واقعہ کا نوٹس لیا اور فون پر عہدیداروں سے واقعہ کی مکمل معلومات لی۔ آگ لگنے کی اطلاع ملتے ہی  نائب وزیر اعلیٰ برجیش پاٹھک لوک بندھو اسپتال پہنچے۔