اگنی پتھ کے خلاف متحدہ کسان مورچہ نے کیا مظاہرہ

ایک طرف متحدہ کسان مورچہ نے کل اگنی پتھ اسکیم کے خلاف نوجوانوں کے ساتھ مل کر احتجاج کیا دوسری جانب اگنی پتھ اسکیم کے خلاف کھاپ اور طلبہ تنظیموں نے بھی ہریانہ کے جند میں مظاہرہ کیا۔ عوام اور طلباء میں اس اسکیم کے خلاف ناراضگی بہت زیادہ ہے۔

مظاہرین کا کہنا تھا کہ اگنی پتھ اسکیم کسی بھی حالت میں قابل قبول نہیں ہوگی، لہٰذا اسے منسوخ کرکے پرانے بھرتی کے عمل کو نافذ کیا جائے اور تمام بھرتیوں میں زیادہ سے زیادہ عمر کی حد میں تین سال کی رعایت دی جائے کیونکہ تین سال سے بھرتیاں نہیں ہورہی ہیں۔ مظاہرین نے اگنی پتھ کے خلاف احتجاج کرنے والے نوجوانوں کے خلاف درج مقدمات کو منسوخ کرنے اور گرفتار نوجوانوں کی رہائی کا بھی مطالبہ کیا۔

منی سیکرٹریٹ میں مظاہرے کے بعد ڈپٹی کمشنر کی جانب سے سے صدر مملکت کو یادداشت بھیجی گئی۔اس کے ساتھ ہی مورچہ لیڈروں نے نوجوانوں سے اپیل کی کہ وہ قانون کو ہاتھ میں نہ لیں اور سرکاری املاک کو نقصان نہ پہنچائیں۔

ادھر بےروزگار سنیکت مورچہ کی کال پر کھاپ کے نمائندوں، طلبہ تنظیموں اور بھرتی کی تیاری کرنے والے نوجوانوں نے منی سیکرٹریٹ کے سامنے گرین بیلٹ میں اظہار ناراضگی کے لئے ایک میٹنگ کا اہتمام کیا۔ اجلاس میں بھارتیہ کسان یونین کے اراکین نے بھی شرکت کی۔ مظاہرین نے شدید نعرے بازی کی۔