کشمیر: سوپور میں تصادم آرائی، دو ملی ٹینٹ ہلاک

سری نگر: شمالی کشمیر کے ضلع بارہمولہ کے سوپور میں جمعرات کے روز سیکورٹی فورسز اور ملی ٹنٹوں کے درمیان تصادم آرائی میں دو ملی ٹنٹ ہلاک ہوگئے۔

پولس ذرائع نے بتایا کہ ملی ٹنٹوں کے چھپنے کی مصدقہ اطلاع ملنے پر فوج کی 22 آر آر، سی آر پی ایف اور ریاستی پولس کے اسپیشل آپریشن گروپ کی ایک مشترکہ ٹیم نے جمعرات کو سوپور کے ڈانگر پورہ کے بونہ پورہ محلے کو محاصرے میں لے کر تلاشی کارروائی شروع کی۔

انہوں نے بتایا کہ کئی گھنٹوں کی تلاشی کارروائیوں کے بعد سیکورٹی فورسز نے مشکوک مقام کی طرف گولیاں چلائیں جس کا جواب وہاں چھپے ملی ٹنٹوں نے جوابی کارروائی کرکے دیا نتیجتاً طرفین کے درمیان تصادم آرائی چھڑ گئی جس کے نتیجے میں دو ملی ٹنٹ ہلاک ہوئے۔

پولس ذرائع نے بتایا کہ جائے تصادم آرائی سے دو ملی ٹنٹوں کی لاشیں بر آمد کی گئی ہیں تاہم ان کی شناخت اور تنظیمی وابستگی معلوم ہونا ابھی باقی ہے۔ انہوں نے بتایا کہ تصادم آرائی کے مقام سے قابل اعتراض مواد بشمول کچھ ہتھیار بھی بر آمد کیے گئے ہیں۔ پولس ترجمان نے لوگوں سے جائے تصادم آرائی پر جانے سے پرہیز کرنے کی تاکید کی ہے۔

ترجمان نے اپنے بیان میں کہا 'لوگوں سے اپیل کی جاتی ہے کہ وہ جائے تصادم آرائی کی طرف تب تک نہ جائیں جب تک اس جگہ کو کسی بھی دھماکہ خیز مواد سے پاک وصاف نہ کیا جائے'۔ دریں اثنا حکام نے سوپور قصبہ میں افواہ بازی کی روک تھام کے لئے موبائل انٹرنیٹ خدمات معطل کی ہیں۔