بی جے ڈی لیڈر کی رہائش گاہ پر ای ڈی کا چھاپہ، نوٹوں سے بھری الماری ملنے سے تفتیشی ٹیم بھی ششدر

انفورسمنٹ ڈائرکٹوریٹ(ای ڈی) نے جمعہ کے روزغیرقانونی کان کنی معاملے میں ضلع گنجام کے بیجو جنتا دل(بی جے ڈی) کے نائب صدراورٹھیکیدار ہرشی کیش پاڑھی کی رہائش گاہ پر چھاپہ مارا۔ اس دوران بھاری مقدار میں نقدی برآمد ہوئی جس سے پورے علاقے میں سنسنی پھیل گئی۔ خبروں کے مطابق اس مہم کے دوران ای ڈی افسران کو نوٹوں کے بنڈلوں سے بھری ہوئی الماریاں ملیں جس سے تفتیشی ٹیم کے اہلکار بھی ششدر رہ گئے۔

بی جے ڈی لیڈر پاڑھی کے مبینہ نیٹ ورک اور مالی روابط کی بنیاد پرای ڈی نے گنجام ضلع میں تقریباً 20 مقامات پر بیک وقت چھاپے مارے۔ اس کے علاوہ برہام پور شہر میں کئی تاجروں کی رہائش گاہوں پر بھی تلاشی مہم چلائی جس میں بیجی پور، لانجی پلی، جے پرکاش نگر اور نیو بس اسٹینڈ کے قریب کے علاقے شامل ہیں۔

کہا جارہا ہے کہ یہ چھاپے ٹیکس چوری اور بڑے پیمانے پر مالی بے ضابطگیوں کے الزامات کے سلسلے میں مارے جا رہے ہیں جن میں ہرشی کیش پاڑھی اور ان کے ساتھی شامل ہیں۔ حالانکہ انفورسمنٹ ڈائریکٹوریٹ نے ابھی تک ضبط شدہ نقدی کے ذرائع اور صحیح رقم کے بارے میں کوئی سرکاری بیان جاری نہیں کیا ہے۔

خبر کے مطابق ضلع میں کئی ریت مافیاؤں نے مبینہ طور پر آٹو مالکان، ٹریکٹر ڈرائیوروں اور پان اور مٹھائی کی دکان کے مالکان کے نام پر ریت کے پٹے حاصل کرکے بھاری ناجائز کمائی ہے۔ کم از کم 6 ایسے ریت مافیاؤں کے خلاف ثبوتوں کی بنیاد پر ای ڈی نے کارروائی شروع کی، جس کے نتیجے میں بھاری مقدار میں نقدی برآمد ہوئی ہے۔ مزید تفتیش جاری ہے اور جانچ آگے بڑھنے کے ساتھ ساتھ مزید معلومات سامنے آنے کی امید ہے۔

یہ احاطے دلالوں، سنگین مجرمانہ پس منظر والے مافیاؤں اور ان کے کاروباری شراکت داروں سے تعلق رکھتے ہیں۔ ان میں غنڈے اور طاقتور لوگ شامل بتائے جارہے ہیں جو اپنی طاقت کا استعمال کرتے ہوئے مقامی باشندوں کے استحصال اور انہیں دہشت زدہ کرکے جبراً چھوٹے معدنیات کی جبراًکان کنی کرتے ہیں۔

اس سے قبل ای ڈی نے ضلع گنجام میں فرضی اور من گھڑنت دستاویزات کا استعمال کرکے چھوٹے معدنیات کی غیر قانونی کان کنی اور نقل و حمل میں شامل مختلف ریت مافیاؤں کے خلاف درج کئی ایف آئی آر کی بنیاد پر ای سی آئی آر درج کرکے تحقیقات کا آغاز کیا تھا۔ حال ہی میں سی اے جی نے گنجام ضلع میں روشی کلیا، باہودا اور باڑہ ندیوں میں بڑے پیمانے پر غیر قانونی کان کنی کا پردہ فاش کیا، جس سے سرکاری خزانے کو بھاری نقصان ہوررہا ہے۔