منی لانڈرنگ کیس میں ای ڈی نے مختار انصاری کو کیا گرفتار

الہ آباد: مشرقی یوپی کے زورآور لیڈر مختار انصاری کے خلاف درج منی لانڈرنگ کیس کے سلسلہ میں ان کے رکن اسمبلی بیٹے عباس انصاری اور نسبتی عاطف سرجیل رضا کو گرفتار کرنے کے بعد ای ڈی نے مختار انصاری کو بھی گرفتار کر لیا ہے۔ انصاری فی الحال جیل میں ہیں اور انہیں بدھ کی صبح الہ آباد ضلع عدالت میں پیش کیا گیا تھا، جس کے بعد ای ڈی نے انہیں گرفتار کر لیا۔ ای ڈی کا کہنا ہے کہ اس کے پاس بی ایس پی کے سابق رکن اسمبلی مختار انصاری کے خلاف کافی ثوبت ہیں۔

رپورٹ کے مطابق ای ڈی مختار انصاری کو 14 روزہ ریمانڈ میں لینے کی درخواست کرے گی۔ قبل ازیں ای ڈی نے مختار انصاری کے خلاف کارروائی بھی شروع کرتے ہوئے پروڈکشن وارنٹ جاری کرایا تھا۔ ای ڈی نے گزشتہ سال بھی اس معاملہ میں 59 سالہ لیڈر سے پوچھ گچھ کی تھی۔

سرکاری ذرائع نے بتایا کہ ای ڈی نے انہیں منی لانڈرنگ کی روک تھام ایکٹ (پی ایم ایل اے) کی مجرمانہ دفعات کے تحت اپنی تحویل میں لے لیا۔ ایجنسی کے جاری کردہ پروڈکشن وارنٹ کی بنیاد پر انہیں الہ آباد کی عدالت میں پیش کیا گیا تھا۔ خیال رہے کہ مرکزی تحقیقاتی ایجنسی نے نومبر میں ان کے ایم ایل اے بیٹے عباس انصاری کو الہ آباد میں ان کے دفتر میں پوچھ گچھ کے بعد گرفتار کیا تھا۔ اس سے قبل مختار انصاری کے رشتہ دار عاطف رضا کو بھی گرفتار کیا گیا تھا۔

ای ڈی نے عدالت میں دلیل دی کہ مختار انصاری کے خلاف منی لانڈرنگ کیس میں چارج شیٹ داخل کرنے کے لیے ماضی میں مختار کے قریبی رشتہ داروں سے پوچھ گچھ کی جا چکی ہے۔ ای ڈی کے مطابق خاندان کے افراد اور قریبی دوستوں کے بیانات کی تصدیق ضروری ہے۔ عدالت نے فریقین کو سننے کے بعد فی الحال اپنا فیصلہ محفوظ کر لیا ہے جس کے بعد مختار انصاری کو سخت سکیورٹی کے درمیان ضلعی عدالت سے انفورسمنٹ ڈائریکٹوریٹ کے دفتر بھیج دیا گیا ہے۔