چھتیس گڑھ: سیکورٹی فورسز نے 14 مہینوں میں 274 نکسلیوں کو کیا ہلاک، دیگر 1166 گرفتار اور 969 نے کی خود سپردگی

چھتیس گڑھ کے بیجاپور میں اتوار (9 فروری) کو ہوئے تصادم میں سیکورٹی فورسز نے 31 نکسلیوں کو ہلاک کر دیا۔ یہ تصادم بیجاپور کے نیشنل پارک ایریا کمیٹی علاقے جنگل میں ڈی آر جی، ایس ٹی ایف اور بستر فائٹر کی مشترکہ ٹیم اور نکسلیوں کے درمیان ہوا۔ سیکورٹی فورسز نے جائے وقوع سے بڑی مقدار میں اے کے-47، ایس ایل آر، انساس رائفل، بی جی ایل لانچر سمیت دھماکہ خیز مواد برآمد کیے۔

واضح ہو کہ نکسلیوں سے ہوئے تصادم میں 2 فوجی جوان بھی شہید ہوئے ہیں جب کہ دیگر 2 زخمی ہوئے ہیں جنہیں اسپتال میں داخل کرایا گیا ہے۔ دونوں زخمی فوجی اب خطرے سے باہر ہیں۔ چھتیس گڑھ کے بیجاپور میں رواں سال نکسلیوں کے خلاف 4 بڑے تصادم ہوئے ہیں۔ پہلے تصادم میں 5، دوسرے میں 12، تیسرے میں 8 اور چوتھے میں 31 نکسلیوں کو ہلاک کیا گیا۔ جب کہ مرکزی وزیر داخلہ امت شاہ دعویٰ کر چکے ہیں کہ 31 مارچ 2026 تک پورے ملک سے نکسلیوں کو ختم کر دیا جائے گا۔  

اگر گزشتہ 14 مہینوں کی بات کی جائے تو چھتیس گڑھ میں سیکورٹی فورسز نے 274 نکسلیوں کو تصادم میں ہلاک کیا ہے۔ وہیں اس دوران 1166 نکسلیوں کو گرفتار کیا گیا تو 969 نکسلیوں نے خود سپردگی کی۔ 2025 میں اب تک 81 نکسلیوں کو ہلاک کیا جا چکا ہے جس میں سے 65 کا تعلق بستر ڈویژن سے تھا جس میں بیجاپور سمیت 7 اضلاع شامل ہیں۔ پولیس کے مطابق گزشتہ سال چھتیس گڑھ میں الگ الگ تصادم میں سیکورٹی فورسز نے 219 نکسلیوں کو مار گرایا تھا۔

قابل ذکر ہے کہ بستر رینج کے انسپکٹر جنرل آف پولیس سندر راج پی کے مطابق تصادم اس وقت شروع ہوا جب مختلف سیکورٹی فورسز کی ایک مشترکہ ٹیم نکسل مخالف آپریشن پر نکل رہی تھی۔ چھتیس گڑھ کے نکسل متاثرہ علاقوں میں سیکورٹی فورسز کی کارروائیاں جاری ہیں۔ رپورٹ کے مطابق سیکورٹی فورسز کے ساتھ تصادم میں ہلاک ہونے والے نکسلیوں کی تعداد میں مزید اضافہ ہو سکتا ہے۔