میرٹھ میں کورونا متاثرین کی لاشیں بدلیں، آخری رسومات ادا کرنے کے وقت انکشاف

میرٹھ: میرٹھ کے لالہ لاجپت رائے میموریل میڈیکل کالج کے ڈاکٹروں اور اسٹاف کی لاپرواہی کے سبب کورونا متاثرین کی لاشیں آپس میں بدل گئیں اور آخری رسومات کے دوران معاملے کا انکشاف ہوا۔ اس معاملہ میں ضلع مجسٹریٹ نے ایک اعلی سطحی جانچ کمیٹی قائم کرتے ہوئے جانچ میں قصوروار پائے جانے والوں کے خلاف سخت کارروائی کرنے کی ہدایت دی ہے۔

سرکاری ذرائع کے مطابق میرٹھ میڈیکل کالج اسپتال کے کورونا وارڈ میں داخل مودی نگر کے گروچن اور میرٹھ کے یشپال کی موت ہوگئی تھی۔ دونوں لاشیں پوسٹ مارٹم ہاوس میں پیک کی گئیں اور اس کے بعد ان کے رشتہ داروں کو آخری رسومات کے لئے دے دی گئیں۔

میڈیکل کالج کے ڈاکٹر لوکیش نے بتایا کہ یشپال کے رشتہ داروں کے پاس گروچن کی لاش پہنچ گئی تھی جن کی آخری رسومات آج ادا کردی گئیں جبکہ گروچن کے گھر والوں کے پاس یشپال کی لاش پہنچی جہاں آخری دیدار کے دوران لاش بدل جانے کا پتہ چلا۔ بتایا گیا ہے کہ ایک صفائی ملازم نے نشہ میں لاش پر چسپاں کی جانے والی چٹیں بدل دی تھیں، جس سے لاشیں آپس میں بدل گئیں۔

ضلع انتظامیہ کو اس کی اطلاع دیئے جانے پر ضلع مجسٹریٹ انل ڈینگرا نے فوری طور پرمعاملہ کی جانچ کے لئے ایک ٹیم قائم کی، جس میں اے ڈی ایم سٹی اجے کمار تیواری اور سی ایم او ڈاکٹر راجکمار کو شامل کیا گیا ہے۔ ڈینگرا نے واضح طورپر کہا کہ قصورواروں کے خلاف سخت کاروائی کی جائے گی او ر ایسی لاپرواہی برداشت نہیں کی جاسکتی۔