بی جے پی پڈوچیری الیکشن میں پیسے اور سرکاری طاقت کا کر رہی استعمال: کانگریس

پڈوچیری: کانگریس کے جنرل سکریٹری دنیش گنڈو راؤ نے ہفتہ کو بی جے پی پر رائے دہندگان کو خریدنے کا منصوبہ بنانے کا الزام لگاتے ہوئے کہاکہ بھگوا پارٹی پیسے اور سرکاری طاقت پر پڈوچیری میں الیکشن لڑنا چاہتی ہے۔ گنڈو راؤ نے سابق وزیر اعلی نارائن سامی کے ساتھ نامہ نگاروں سے کہا کہ جیسے جیسے الیکشن کی تاریخ نزدیک آرہی ہے، مرکزی وزیر امت شاہ، نرملا سیتا رمن، گری راج سنگھ اور ارجن رام میگھوال اور بی جے پی کے دیگر لیڈر پڈوچیری کا بار بار دورہ کررہے ہیں۔

کانگریس لیڈر نے کہا کہ بی جے پی کے لیڈر گزشتہ پانچ برس تک کہاں تھے۔ وزیراعظم نریندر مودی نے حال ہی میں پڈوچیری کا دورہ کیا تھا تو انہوں نے یہاں سیاحت کی ترقی، کاروبار، تعلیم اور روحانیت پر توجہ دینے کا یقین دلایا تھا۔ بی جے پی کی طرف سے وزیر خزانہ نرملا سیتا رمن کے جاری کئے گئے منشور میں ان یقین دہانیوں کو پورا کرنے سے متعلق کوئی جھلک نظر نہیں آئی۔ یہ ایک عام انتخابی منشور ہے جس میں مرکز کے زیرانتظام ریاست کے لوگوں کی فلاح وبہبود کے لئے کچھ بھی نہیں ہے۔

سینئر کانگریسی لیڈر نے مزید کہا کہ پڈوچیری کو ریاست کا درجہ دینے کی کانگریس اور ڈی ایم کے کی پالیسی رہی ہے۔ این آر کانگریس کے صدر این رنگا سوامی نے بھی کہا تھا کہ اگر پڈوچیری کو ریاست کا درجہ نہیں دیا گیا تو ان کی پارٹی انتخابات کا بائیکاٹ کرے گی۔ انہوں نے یہ بھی کہا کہ بی جے پی نے اپنے منشور میں پڈوچیری کو ریاست کا درجہ دینے کے بارے میں کچھ بھی نہیں کہا ہے۔ اب رنگا سوامی کو اپنا موقف صاف کرنا چاہئے کیا وہ پڈوچیری کو ریاست کا درجہ نہیں دینے کے بی جے پی کے فیصلے کو قبول کرتے ہیں۔