ایس آئی آر: مہوبہ میں ایک گاؤں سے پردھان سمیت 2300 ووٹروں کے نام غائب، انتظامیہ کی کارکردگی پر سوال

اترپردیش کے مہوبہ میں ووٹر لسٹ ریویژن (ایس آئی آر) کے دوران انتظامیہ کی جانب سے سنگین لاپرواہی سامنے آئی ہے۔ اطلاعات کے مطابق کبرائی ترقیاتی بلاک میں سری نگر گرام پنچایت کے پردھان سمیت تقریباً 2,300 گاؤں والوں کے نام ووٹر لسٹ سے غائب کر دیے گئے ہیں۔

معاملے میں سب سے چونکا نے والی بات یہ ہے کہ سری نگر کا موجودہ گاؤں پردھان آشیش راجپوت بھی اس لاپرواہی کا شکار ہو گیا ہے۔ آشیش راجپوت کے ساتھ ان کے خاندان کے دیگر افراد اور گاؤں کے ہزاروں ووٹرز کے نام ووٹر لسٹ سے غائب ہیں۔ پریشان گاؤں پردھان نے آناً فاناً ضلع مجسٹریٹ غزل بھاردواج کے دفتر پہنچ کر انصاف کی فریاد کی۔

اس سنگین معاملے کا نوٹس لیتے ہوئے مہوبہ کے ایس ڈی ایم شیودھیان پانڈے نے بتایا کہ ریاستی الیکشن کمیشن کی ہدایات کے تحت ووٹر لسٹ پر نظر ثانی کی جا رہی ہے۔ سری نگر گاؤں کے پردھان کی طرف سے درج کرائی گئی شکایت کی جانچ جاری ہے۔ انتظامیہ کا کہنا ہے کہ جن لوگوں کا نام فہرست سے کٹ گیا ہے وہ گھبرائیں نہیں، وہ 30 ​​دسمبر تک متعلقہ فارم کو پُر کر کے اپنے دعوے جمع کرا سکتے ہیں۔

حالانکہ اب سوال یہ پیدا ہوتا ہے کہ ملک گیر پیمانے پر کئے جانے والے اس بڑے اور سنجیدہ عمل میں شامل کی گئی اہلکاروں کی فوج کی موجودگی کے باوجود اتنی بڑی لاپرواہی کیسے ہوئی جس کی وجہ سے ہزاروں لوگوں کے نام ووٹر لسٹ سے کٹ گئے۔ گاؤں کے لوگ اور پردھان اپنے جمہوری حقوق واپس پانے کے لیے فارم بھرنے کے عمل میں مصروف ہیں۔