کورونا وائرس کی دوا کے نام پر بابا رام دیو کو کھیلواڑ کرنے کی اجازت نہیں دی جاسکتی: کانگریس

نئی دہلی: کانگریس نے کہا ہے کہ یوگ گرو بابا رام دیو نے جس دوا کو کورونا وائرس کے علاج کے لیے لانچ کیا ہے، اس پر خود حکومت کی طرف سے سوالات اٹھا ئے گئے ہيں، اس لیے اس دوا کو بازار میں نہیں اتارا جاسکتا اور اگر ایسا ہوتا ہے تو حکومت کو اسے سنجیدگی سے لینا چاہیے۔ کانگریس کے ترجمان منیش تیواری نے پیر کے روز پریس کانفرنس کےدوران اس سلسلے میں کہا کہ اگر کوئی شخص کورونا کی عالمی وبا کے اس دور میں کووڈ- 19 کے علاج کی دوا بنانے کا دعوی کرتا ہے اور حکومت خود اس کے دعوے پر سوال اٹھاتی ہے تو اس دوا کو بازار میں اتارنا ملک کی 1.25 ارب آبادی کے ساتھ کھیلواڑ ہوگا اور اس کی کسی کو اجازت نہیں دی جاسکتی ہے، اس لیے حکومت کو اسے سنجیدگی سے لینا چاہیے۔

انہوں نے کہا کہ اس وقت لوگ کورونا وائرس سے پریشان ہیں اور اگر کوئی دوا بنانے کا دعویٰ کرتا ہے تو لوگ اسے خریدیں گے۔ اگر کوئی اس کے استعمال کی وجہ سے فوت ہوجاتا ہے تو پھر اس کا ذمہ دار کون ہوگا؟۔ جب تک کوئی دوا پختہ شکل میں بن کر تیار نہیں ہوجاتی اور کسی دوا کو معیاروں کے مطابق جانچ کیے بغیر مارکیٹ میں اتارا جا تا ہے، تو حکومت کو اس معاملے میں سنجیدگی سے قدم اٹھانا چاہیے۔

منیش تیواری نے کہا کہ اگر وزارت آیوش اسے سنجیدگی سے نہیں لیتی ہے تو بہت سے دوسرے لوگ بھی اسی طرح سے دوا بنانے کا دعوی کرنا شروع کردیں گے۔ انہوں نے کہا کہ ہر ایک کی خواہش ہے کہ کورونا کی پختہ دوا بنائی جائے، لیکن اس دوا کو سائنسی حقائق کے ذریعہ جانچ کرکے لائسنس یافتہ ہونا چاہے۔ بتایا جاتا ہے کہ اترا کھنڈ کی وزارت آیوش نے رام دیو کی اس دوا کو مدافعتی قوت میں اضافہ کرنے کے لیے لانچ کرنے کی اجازت دی ہے، نہ کہ کورونا وائرس کے علاج کے طور پر مارکیٹ میں اتارنے کی اجازت دی ہے۔ مرکزی حکومت نے آج ہی بابا رام دیو کی اس دوا کا اشتہار روک دیا ہے۔