عآپ کا سپریم کورٹ سے نشی کانت دوبے کے خلاف توہین عدالت کا مقدمہ درج کرنے کا مطالبہ

وقف ایکٹ کی حمایت اور احتجاج کے درمیان بی جے پی کے رکن پارلیمنٹ نشی کانت دوبے نے سپریم کورٹ پر اپنے بیان سے ایک نیا تنازع کھڑا کر دیا ہے۔ اس کے بعد بی جے پی رکن پارلیمنٹ کے اس بیان کی ہر طرف تنقید ہو رہی ہے۔ ادھر عام آدمی پارٹی نے بھی نشی کانت دوبے کو نشانہ بنایا ہے۔

عام آدمی پارٹی کی ترجمان پرینکا ککڑ نے کہا، "ہم نے سپریم کورٹ سے مطالبہ کیا ہے کہ نشی کانت دوبے کے خلاف توہین کا مقدمہ درج کیا جائے اور انہیں جیل بھیجا جائے، انہوں نے بہت برا بیان دیا ہے۔ مجھے امید ہے کہ کل سپریم کورٹ بی جے پی کے رکن پارلیمنٹ نشی کانت دوبے کے خلاف ازخود نوٹس لے گی اور ان کے خلاف توہین عدالت کی کارروائی شروع کرے گی اور جیل بھیجے گی۔"

انہوں نے مزید کہا کہ ’’جب بھی کوئی جج بی جے پی کے حق میں فیصلہ دیتا ہے تو اسے راجیہ سبھا میں بھیج دیا جاتا ہے اور اب جب ایک جج نے ہدایت دی کہ قانون پر عمل کیا جانا چاہیے اور گورنروں کو بلوں پر غیر معینہ مدت تک نہیں بیٹھنا چاہیے، بی جے پی نے ججوں کو بدنام کرنے اور سپریم کورٹ پر حملہ کرنے کے لیے اپنے تمام وسائل استعمال کیے ہیں۔‘‘

واضح رہے کہ 19 اپریل کو بی جے پی کے رکن پارلیمنٹ نشی کانت دوبے نے وقف (ترمیمی) ایکٹ پر سپریم کورٹ میں جاری سماعت کو لے کر ایسا بیان دیا تھا، جس سے تنازعہ کھڑا ہوگیا تھا۔ انہوں نے واضح طور پر عدلیہ پر حملہ کیا، پارلیمنٹ کے منظور کردہ قانون میں اس کی مداخلت پر سوال اٹھایا۔ عدلیہ کے کردار کا تذکرہ کرتے ہوئے بی جے پی کے رکن پارلیمنٹ نشی کانت دوبے نے کہا کہ اگر عدالت قانون بنانے کا کام کرتی ہے تو پارلیمنٹ کا وجود بے معنی ہو جاتا ہے۔

اس کے ساتھ ہی نشی کانت دوبے نے سوشل میڈیا پلیٹ فارم ایکس پر ایک پوسٹ میں لکھا، ’’اگر سپریم کورٹ قانون بنائے گی تو پارلیمنٹ کو بند کر دینا چاہیے۔‘‘ ان کی پوسٹ کو قانون کے مختلف پہلوؤں کا جائزہ لینے اور کم و بیش اسے معطل کرنے میں عدلیہ کے کردار پر بالواسطہ تنقید کے طور پر دیکھا جا رہا ہے۔