پارلیمنٹ ہاؤس کے قریب ایک اور مشتبہ شخص حراست میں، دہلی پولیس کر رہی ہے پوچھ گچھ

راجدھانی دہلی میں پارلیمنٹ ہاؤس کے قریب سیکوریٹی ایک مرتبہ پھر سوالوں کے گھیرے میں ہے۔ سی آئی ایس ایف نے ہفتہ کو پارلیمنٹ ہاؤس کے قریب ایک اور مشتتبہ شخص کو حراست میں لیا۔ اطلاع کے مطابق مشتبہ سرگرمیوں پر نظر پڑتے ہی سی آئی ایس ایف جوانوں نے ریل بھون کے قریب سے اس شخص کو پکڑ لیا۔ فی الحال اسے دہلی پولیس کے حوالے کر دیا گیا ہے۔ پولیس اس کے دستاویزوں کی جانچ کر رہی ہے اور پوچھ تاچھ جاری ہے۔

حالانکہ دہلی پولیس نے صاف کیا ہے کہ پارلیمنٹ کی سیکوریٹی میں کسی بھی طرح کی خلاف ورزی نہیں ہوئی ہے۔ پولیس افسروں نے بتایا کہ یہ حراست ’روکو ٹوکو مہم‘ کے تحت ہوئی ہے۔ اس مہم میں حساس علاقوں میں مشتبہ نظر آنے والے لوگوں کو روک کر ان کی جانچ کی جاتی ہے۔

غور طلب ہے کہ گزشتہ دو دنوں میں پارلیمنٹ ہاؤس کے آس پاس کسی مشتبہ شخص کے پکڑے جانے کا یہ دوسرا معاملہ ہے۔ اس طرح کے واقعات نے سیکوریٹی ایجنسیوں کی فکرمندی بڑھا دی ہے۔ جمعہ 22 اگست کو بھی پارلیمنٹ ہاؤس کی سیکوریٹی میں خلاف ورزی کا سانگین معاملہ سامنے آیا تھا۔ یہاں ایک شخص پیڑ پر چڑھتے ہوئے دیوار پھاند کر پارلیمنٹ احاطہ کے اندر داخل ہو گیا۔ لیکن سیکوریٹی اہلکاروں نے درانداز کو پکڑ لیا اور اس سے پوچھ تاچھ کی جا رہی ہے۔ پولیس ڈپٹی کمشنر (نئی دہلی) دیویش مہلا نے بتایا کہ مشتبہ شخص ذہنی طور سے معذور لگتا ہے۔

ذرائع نے بتایا کہ صبح قریب پانچ بجے آئی جی-3 گیٹ پر تعینات سی آئی ایس ایف اہلکاروں نے ایک شخص کو پارلیمنٹ چوک سرکل کی طرف آتے ہوئے دیکھا اور اسے علاقے سے چلے جانے کو کہا۔ کچھ دیر بعد اسے ریڈ کراس روڈ پر مورچہ-8 کے قریب دیکھا گیا، جہاں اہلکاروں نے اسے پکڑ لیا اور وہ اسے وہاں سے لے گئے اور پھر پارلیمنٹ کے سیکوریٹی اہلکاروں کو اس کی اطلاع دی۔

پارلیمنٹ ہاؤس کے آس پاس سیکوریٹی میں تساہلی کا یہ کوئی پہلا معاملہ نہیں ہے۔ اس سے پہلے بھی کئی مشتبہ لوگ پکڑے جا چکے ہیں۔ خاص طور پر 2023 میں جب پارلیمنٹ پر حملے کی برسی کے دن بڑی سیکوریٹی چوک ہو گئی تھی۔

ساگر شرما اور منورنجن ڈی نامی دو نوجوان پارلیمنٹ میں جاری کارروائی کے درمیان لوک سبھا ہال میں داخل ہو گئے تھے۔ ان لوگوں نے پارلیمنٹ میں لوگوں کی گیلری سے کودنے کے بعد لوک سبھا ہال کے اندر پیلے رنگ کا دھواں چھوڑا تھا۔ حالانکہ ایوان میں موجود اراکین پارلیمنٹ نے دونوں کو پکڑ لیا تھا۔ اس معاملے میں کُل 6 لوگوں کی گرفتاری ہوئی تھی۔ دیگر دو ملزمین میں مہیش کماوت اور اور للت جھا شامل تھا۔ دہلی پولیس نے سیکوریٹی میں چوک کو لے کر پٹیالہ ہاؤس کورٹ میں 900  سے زائد صفحات پر مبنی ایک چارج شیٹ دائر کی تھی۔