امت شاہ کا مرادآباد، علی گڑھ اور اناؤ میں منعقدہ جلسوں سے خطاب

لکھنؤ: اتر پردیش میں قانون ساز اسمبلی کے انتخابات کی تیاریوں کے پیش نظر جمعرات کو بھارتیہ جنتا پارٹی (بی جے پی) کی طرف سے منعقد ’جن وشواس یاترا‘ کے تحت پارٹی کے سابق صدر اور وزیر داخلہ امت شاہ نے مراد آباد میں جلسہ عام سے خطاب کیا۔ اس کے علاوہ ان کا علی گڑھ اور اناؤ میں بھی جلسوں سے خطاب کرنے کا بھی پروگرام ہے۔

قابل ذکر ہے کہ امت شاہ کو بی جے پی نے اترپردیش اسمبلی انتخابات میں مغربی اتر پردیش علاقہ کی ذمہ داری سونپی ہے۔ بی جے پی کے جاری کردہ ایک بیان کے مطابق امت شاہ کے علاوہ اتر پردیش کے وزیر اعلی یوگی آدتیہ ناتھ جمعرات کو مہاراج گنج اور پیلی بھیت میں عوامی جلسوں سے خطاب کریں گے۔ جبکہ ریاست کے نائب وزیر اعلیٰ کیشو پرساد موریہ مراد آباد میں اور نائب وزیر اعلیٰ ڈاکٹر دنیش شرما مہاراج گنج میں جلسہ عام سے خطاب کریں گے۔

بی جے پی نے 19 دسمبر کو بجنور، متھرا، جھانسی، امبیڈکر نگر، بلیا اور غازی پور سے جن وشواس یاترا کی شروعات کی تھی۔ یہ یاترا ریاست کے تمام 403 اسمبلی حلقوں سے گزریں گی تاکہ یوگی حکومت کے پچھلے پانچ برسوں کے کاموں پر لوگوں کا اعتماد حاصل کیا جا سکے۔

ان دوروں کے سلسلے میں ریاستی حکومت کے وزیر بھوپیندر سنگھ چودھری اور ایم پی وجے پال تومر جمعرات کو مراد آباد کے جلسہ عام میں شرکت کریں گے۔ دوسری طرف سابق مرکزی وزیر، ایم پی سنتوش گنگوار، ریاستی حکومت کے وزیر جتن پرساد اور ایم پی ارون ساگر پیلی بھیت کی عوامی میٹنگ اور یاترا میں شامل ہوں گے۔

ان کے علاوہ یوپی کے وزیر قانون برجیش پاٹھک اور ایم پی آر کے پٹیل قنوج میں جن وشواس یاترا میں حصہ لیں گے جبکہ جونپور میں ریاستی حکومت کے وزراء ڈاکٹر مہندر سنگھ اور رماشنکر سنگھ پٹیل اس یاترا میں شامل ہوں گے۔