جو بھی ہوا ہے، اس پرضروری کارروائی کی جائے گی: ناگپور فسادات پر ریاستی اقلیتی کمیشن کے چیئرمین کا بیان

مہاراشٹر میں مغل حکمران اورنگ زیب کے خلاف جاری تنازعہ کے درمیان ناگپور میں تشدد پھوٹ پڑا ہے۔ ناگپور کے محال علاقے میں کشیدگی کا ماحول بنا ہوا  ہے۔ فی الحال پولیس نے بتایا ہے کہ حالات قابو میں ہیں، تاہم اب تک کئی گاڑیاں جل چکی ہیں اور پولیس ٹیم پر پتھراؤ کیا گیا ہے، جس میں کئی پولیس اہلکار زخمی ہوئے ہیں۔

واضح رہے کہ پیر  یعنی17 مارچ کی صبح وشو ہندو پریشد اور بجرنگ دل کے کارکنوں نے اورنگ زیب کی قبر کو ہٹانے کے لیے اسی جگہ پر مظاہرہ کیا ۔ یہاں اورنگزیب کا علامتی مجسمہ  کوبھی جلایا گیا۔ اس کے بعد شام کو شیواجی چوک کے قریب چٹنیس پارک علاقے میں پتھراؤ ہوا۔ بتایا جا رہا ہے کہ اس واقعہ میں کئی گاڑیوں کو نقصان پہنچا ہے۔

دریں اثناء مہاراشٹرا ریاستی اقلیتی کمیشن کے چیئرمین پیارے خان نے تشدد پر ردعمل ظاہر کیا ہے۔ انہوں نے کہا، "یہ بدقسمتی کی بات ہے کہ محال کے علاقے میں دو گروپوں کے درمیان جھگڑے کے بعد شہر میں کشیدہ صورتحال پیدا ہو گئی ہے۔" اس دوران انہوں نے ناگپور کے لوگوں سے امن برقرار رکھنے اور حالات پر قابو پانے میں انتظامیہ کے ساتھ تعاون کرنے کی اپیل کی ہے۔

پیارے خان نے کہا، "ناگپور ہمیشہ سے امن اور ہم آہنگی کی علامت رہا ہے، جہاں سے پوری دنیا میں ہندو مسلم بھائی چارے کا پیغام جاتا ہے۔ یہ شہر ذات پات، فرقہ یا مذہب کی بنیاد پر جھگڑوں سے دور رہا ہے۔ آج جو بھی واقعہ ہوا انتظامیہ اس پر ضروری کارروائی کرے گی۔"

پیارے خان نے شہریوں سے اپیل کرتے ہوئے کہا کہ ’آپ کی ترقی ملک، معاشرے اور آپ کی ترقی کا باعث بنتی ہے لیکن ایسے واقعات نہ صرف معاشرے کا ماحول خراب کر سکتے ہیں بلکہ آپ کے مستقبل کو بھی تاریکیوں میں ڈال سکتے ہیں۔ پولیس ایسے واقعات میں ملوث افراد کے خلاف سخت کارروائی کرے گی۔ میں سب سے درخواست کرتا ہوں کہ ایسے وقت میں امن برقرار رکھیں اور انتظامیہ کے ساتھ تعاون کریں۔‘

ان کا مزید کہنا تھا کہ ’’واقعے کے فوراً بعد ہم نے ملزمان کے خلاف مقدمہ درج کر لیا۔ یہ واقعہ قابل مذمت اور شرمناک ہے۔‘‘ انہوں نے ناگپور کے شہریوں سے اپیل کی کہ وہ ہم آہنگی برقرار رکھیں اور شہر کے امن اور اتحاد کو مضبوط بنانے کے لیے اپنی کوششیں کریں۔