عصمت دری کا ملزم اے اے پی ممبر اسمبلی آسٹریلیا فرار، تلاش کرتی رہ گئی پنجاب پولیس

 عصمت دری کیس کے ملزم پنجاب کے پٹیالہ ضلع کے سنور حلقے سے عام آدمی پارٹی (اے اے پی) کے ممبراسمبلی ہرمیت سنگھ پٹھان ماجرا ملک سے فرار ہوگیا ہے۔ بتایا جاتا ہے کہ پٹھان ماجرا ملک سے فرار ہو کر آسٹریلیا پہنچ گیا ہے۔ پنجاب پولیس دو ماہ سے پٹھان ماجرا کو تلاش کررہی تھی۔ اس دوران پٹھان ماجرا نے آسٹریلیا میں ایک نجی چینل کو انٹرویو بھی دیا ہے۔ یہ انٹرویو 7 نومبر کو سوشل میڈیا پر اپ لوڈ کیا گیا تھا۔ اس میں پٹھان ماجرا نے بھگونت مان حکومت پر سخت حملہ کرتے ہوئے اپنے خلاف چلائے گئے کیس کو جھوٹا قرار دیا ہے۔

پٹھان ماجرا نے کہا کہ وزیر اعلی بھگونت مان کو پنجاب کے مسائل سے کوئی لینا دینا نہیں ہے۔ اے اے پی کے سربراہ اروند کیجریوال جو کہتے ہیں، بھگونت مان وہی کرتے ہیں۔ حکومت میں ممبران اسمبلی کی کوئی حیثیت نہیں ہے۔ ان کی آواز کو دبانے کے لیے حکومت نے یہ کیا ہے۔

سنور حلقہ سے اے اے پی کے ممبر اسمبلی ہرمیت سنگھ پٹھان ماجرا تقریباً دو ماہ سے لاپتہ ہیں۔ پنجاب پولیس انہیں تلاش کر رہی ہے۔ پٹیالہ کے سول لائن پولیس اسٹیشن میں پٹھان ماجرا کے خلاف دو ماہ قبل عصمت دری کا مقدمہ درج کیا گیا تھا۔ اس معاملے میں جب پٹیالہ پولیس کی ٹیم ممبراسمبلی کو گرفتار کرنے ہریانہ کے کرنال کے ڈبری گاوں پہنچی تو پٹھان ماجرا پولیس کو چکمہ دے کر وہاں سے فرار ہوگیا۔

پنجاب اور ہریانہ ہائی کورٹ کے سینئر وکیل موہن جین نے کہا کہ اس کیس سے پٹھان ماجرا کی قانون ساز اسمبلی (ایم ایل اے) کی رکنیت پر کوئی اثر نہیں پڑے گا، کیونکہ انہیں ان مقدمات میں سزا نہیں سنائی گئی ہے۔ سزا پانے کے بعد ان کی رکنیت ختم ہو جائے گی۔ دوسری جانب پنجاب پولیس اب پٹھان ماجرا کے خلاف ریڈ کارنر نوٹس جاری کرے گی۔