ڈاکٹر ذاکر حسین کے یوم پیدائش پر محسن جامعہ کو شاندار خراج عقیدت

نئی دہلی: نامور مفکر، عظیم ماہر تعلیم، جامعہ ملیہ اسلامیہ کے محسن و معمار اور ملک کے تیسرے صدر جمہوریہ ڈاکٹر ذاکر حسین کا یوم پیدائش اتوار کو یہاں جامعہ نیشنل فاؤنڈیشن نے جامعہ کے فیکلٹی آف انجینئرنگ اینڈ ٹکنالوجی آڈیٹوریم میں شاندار اہتمام سے منایا۔ فاؤنڈیشن نے ڈاکٹر ذاکر حسین کے 129ویں یوم پیدائش کی یہ تقریب جامعہ ملیہ اسلامیہ کے تعاون سے گزشتہ روز، یعنی اتوار کو منعقد کی تھی۔

اس موقع پر ’جامعہ نیشنل فاؤنڈیشن‘ کا پہلا میموریل لکچر جامعہ ملیہ اسلامیہ کے وائس چانسلر پروفیسر مظہر آصف نے پیش کیا۔ انہوں نے کہا کہ اللہ نے قرآن کریم میں فرمایا ہے کہ اس نے موت و حیات کو اس لیے پیدا کیا ہے کہ انسانوں کو آزمائے کہ ان میں سب سے اچھا عمل کس کا ہے۔ انہوں نے ڈاکٹر ذاکر حسین کی حیات و خدمات پر روشنی ڈالتے ہوئے ملک و قوم اور جامعہ پر ان کے احسانات کو جذباتی خراج عقیدت پیش کیا۔ وہ تقریب کی صدارت بھی کر رہے تھے۔

سابق مرکزی وزیر، انڈیا اسلامک کلچرل سینٹر کے صدر اور ڈاکٹر ذاکرحسین کے نواسے سلمان خورشید نے اس موقع پر کہا کہ ذاکر صاحب کی سب سے بڑی عظمت ان کا ایک ٹیچر اور انسان ہونا ہے۔ انہوں نے ان کی انسانی عظمت کے کئی واقعات کا ذکر کیا۔ کہا کہ ایک بار وہ اسکول کے بچوں میں تقسیم انعامات کی تقریب میں تھے کہ کسی نے ان کے گھر سے آ کر ان کے کان میں کچھ خبر دی۔ وہ مضمحل ہو گئے، لیکن وہ گھنٹے بھر بعد وہاں سے گھر گئے۔ پھر لوگوں کو معلوم ہوا کہ ان کی ننھی بیٹی کا انتقال ہو گیا تھا۔ ان سے کہا گیا کہ آپ اسی وقت کیوں نہیں آگئے۔ تو انہوں نے کہا کہ اگر وہ چلے آتے تو ان معصوم بچوں پر کیا گزرتی۔

فاؤنڈیشن کے سینئر ممبر ڈاکٹر سید فاروق نے اس موقع پر کہا کہ ہر اندھیرے میں چراغ جلانا انسان کی اصل نیکی ہے۔ ذاکر صاحب امید کی علامت ہیں جو سب سے بڑی روشنی ہے۔ جامعہ نیشنل فاؤنڈیشن کے سکریٹری مرزاقمرالحسن بیگ نے اپنے استقبالیہ خطاب میں ڈاکٹر ذاکر حسین سے اپنے والد، جامعہ کوآپریٹو بینک کے بانی اور مشہور سماجی خدمت گار مرزا فرید الحسن بیگ کی زندگی میں ڈاکٹر ذاکرحسین کی شخصی خوبیوں کے کردار کا ذکر کرتے ہوئے کہا کہ ذاکر صاحب نے ان سے کہا تھا کہ لیاقت نہیں ہے تو خدمت کرنا سیکھو اور ان کے اسی سبق نے ان کو وہ راہ دکھائی جس نے جامعہ کے پچاسویں سال میں ذاکر باغ سوسائٹی دی، 75 سال پر جامعہ بینک دیا اور 100ویں سال میں جامعہ نیشنل فاؤنڈیشن دیا۔

جامعہ کے وائس چانسلر پروفیسر مظہر آصف کے یہ ذکر کرنے پر کہ جامعہ کے بہت سے بچوں کے پاس فیس کے پیسے نہیں ہوتے، مرزا قمر الحسن بیگ نے اعلان کیا کہ جامعہ نیشنل فاؤنڈیشن فیس کے مد میں ہر سال ایسے 100 بچوں کی مدد کرے گی۔

ذاکر حسین کی زندگی پر مبنی ایک دستاویزی فلم بھی اس موقع پر دکھائی گئی، جس کے پروڈیوسر اور ڈائریکٹر معروف کشمیری فنکار راجیش پروتھی ہیں۔ رحمان خاں نے ذاکر حسین کی مشہور کہانی ’ابو میاں کی بکری‘ پر مبنی ڈراما پیش کیا۔ پروگرام کی نظامت معین شاداب کر رہے تھے۔ کلمات تشکر فضہ بیگ نے پیش کیے۔ تقریب میں جامعہ کے اساتذہ و طلبہ کے علاوہ جامعہ نیشنل فاؤنڈیشن کے ارکان و متعلقین اور دیگر معززین کی کثیر تعداد شریک تھی۔