بہار میں 94.68 فیصد ووٹرز کی تصدیق مکمل، بقیہ ناموں سے سیاسی جماعتوں کو آگاہ کیا جائے گا

نئی دہلی: بہار میں ووٹر لسٹوں کی اسپیشل انٹینسیو ریویژن (ایس آئی آر) مہم تیزی سے اختتام کے قریب پہنچ رہی ہے اور اب صرف 5.32 فیصد ووٹروں کے فارم انتخابی عہدیداروں کے پاس موصول ہونا باقی ہیں۔ الیکشن کمیشن نے واضح کیا ہے کہ اب تک 94.68 فیصد ووٹرز کا احاطہ کیا جا چکا ہے، جبکہ باقی ماندہ ووٹروں کی معلومات سیاسی جماعتوں کے ساتھ شیئر کی جا رہی ہیں تاکہ ان کی شمولیت بھی یقینی بنائی جا سکے۔

الیکشن کمیشن کی جانب سے جمعہ کی شام جاری کردہ پریس ریلیز کے مطابق، خصوصی گنتی فارم جمع کرانے کی آخری تاریخ میں ابھی سات دن باقی ہیں، جس کے بعد یکم اگست کو ڈرافٹ ووٹر لسٹ جاری کی جائے گی۔ یہ لسٹ ان تمام فارموں کی بنیاد پر تیار کی جائے گی جو الیکٹورل رجسٹریشن آفیسرز کو موصول ہوئے ہیں۔

کمیشن نے یقین دہانی کرائی ہے کہ اس کی جانب سے کسی بھی اہل ووٹر کا نام فہرست سے حذف نہیں کیا جائے گا، اور ہر ممکن کوشش کی جا رہی ہے کہ تمام مستحق افراد کی شمولیت یقینی ہو۔

ریاست بہار میں 24 جون 2025 تک ووٹر لسٹوں میں درج کل ووٹروں کی تعداد 7,89,69,844 تھی، جن میں سے 7,11,72,660 ووٹروں کے فارم موصول ہو چکے ہیں، جو کل کا 90.12 فیصد بنتا ہے۔ اب تک موصولہ فارموں میں سے 6,85,34,743 یعنی 86.79 فیصد فارموں کو ڈیجیٹائز بھی کیا جا چکا ہے۔

کمیشن نے واضح کیا ہے کہ یکم اگست کو شائع ہونے والی ووٹر لسٹ ایک ابتدائی مسودہ ہوگی، جس میں سیاسی جماعتیں اور ووٹرز خود بھی اپنی تفصیلات کا جائزہ لے سکیں گے۔ ڈرافٹ ووٹر لسٹ میں کسی بھی غلطی یا کوتاہی کی نشاندہی کے لیے ایک ماہ کی مہلت دی جائے گی، جس دوران تصحیح یا تبدیلی کی تجاویز الیکٹورل رجسٹریشن آفیسر کے پاس جمع کرائی جا سکتی ہیں۔