’پرانی گاڑیاں لے جائیں دہلی سے باہر، بصورت دیگر ضبط کر کے کردی جائیں گی اسکریپ‘، محکمہ ٹرانسپورٹ کا انتباہ

 اگر آپ دہلی میں رہتے ہیں اورآپ کے پاس 10 سال پرانی ڈیزل کار یا 15 سال سے زیادہ پرانی پٹرول کار ہے تو دہلی حکومت کا تازہ اقدام آپ کی مشکلات میں اضافہ کرنے والا ہے۔ دہلی حکومت کے محکمہ ٹرانسپورٹ نے اب فیصلہ کیا ہے کہ اگرایسی گاڑیاں سڑکوں پر پائی جاتی ہیں تو انہیں بغیر نوٹس کے ضبط کر کے اسکریپ کردیا جائے گا۔

دہلی حکومت کے محکمہ ٹرانسپورٹ نے ہفتے کو نیا پبلک نوٹس جاری کرتے ہوئے انتباہ دیا کہ سڑکوں پر کھڑی یا چل رہی کوئی بھی پرانی گاڑی کو پیشگی اطلاع کے بغیر اسکریپ کر دیا جائے گا۔ دہلی حکومت کے مطابق اس اقدام کا مقصد دہلی میں فضائی آلودگی کے معیارات کو سختی سے نافذ کرنا ہے۔ جس کے تحت 10 سال سے زیادہ پرانی ڈیزل گاڑیاں اور 15 سال پرانی پیٹرول گاڑیاں ’انڈ آف لائف‘ (ای او ایل) یعنی پرانی گاڑیوں کے زمرے میں آتی ہیں۔

اس کارروائی سے بچنے کے لیے دہلی کے محکمہ ٹرانسپورٹ نے ایک نوٹس جاری کیا ہے جس میں پرانی گاڑیوں کے مالکان سے نوآبجیشن سرٹفکیٹ (این اوسی) لینے اور پرانی گاڑیوں کو دہلی سے باہر لے جانے پر زوردیا گیا ہے۔ محکمہ ٹرانسپورٹ کے نوٹس میں کہا گیا ہے کہ دہلی میں عوامی مقامات پر چلنے والی بی ایس-3 اور کم امیشن اسٹینڈرڈ والی پرانی گاڑیوں کو قانون کے مطابق بغیر پیشگی اطلاع کے ضبط کر لیا جائے گا اور پھر انہیں اسکریپ کر دیا جائے گا۔

محکمہ ٹرانسپورٹ نے کہا کہ ایسی گاڑیوں کے مالکان کو مشورہ دیا جاتا ہے کہ انہیں این سی آر سے باہر منتقل کرنے سے پہلے این اوسی حاصل کریں۔ اسی کے ساتھ محکمہ ٹرانسپورٹ جلد ہی دہلی سے پرانی (ای اوایل) گاڑیوں کو ہٹانے کے لیے مہم شروع کرے گا۔ جس سے قومی راجدھانی میں پرانی گاڑیوں کے خلاف بڑے پیمانے پر کریک ڈاؤن شروع ہو جائے گا۔