تلنگانہ میں آج سے 50 ہزار چکن کی دکانیں بند، پولٹری کمپنیوں سے ناراض ’خوردہ فروشوں‘ نے لیا فیصلہ

تلنگانہ میں ’چکن شاپ آنرس ایسوسی ایشن‘ نے بدھ (یکم اپریل) سے پوری ریاست میں ہڑتال کا اعلان کیا ہے۔ ایسوسی ایشن کے مطابق ریاست بھر میں تقریباً 50 ہزار سے زائد چکن کی دکانیں بند رہیں گی۔ دراصل پولٹری کمپنیوں کی جانب سے چکن کی فروخت پر منافع کا مارجن کم کرنے اور دکانداروں کو نقصان پہنچانے کے خلاف ہڑتال کا اعلان کیا گیا ہے۔

ایسوسی ایشن کے مطابق، کارپوریٹ آؤٹ لیٹس کو چھوڑ کر ریاست بھر میں چکن کی 50000 ریٹیل دکانیں بند رہیں گی۔ دکان مالکان کا کہنا ہے کہ فی کلو گرام چکن پر ملنے والا کمیشن کافی کم کر دیا گیا ہے۔ گزشتہ 2 دہائیوں سے پولٹری کمپنیاں خوردہ دکانداروں کے لیے 26 روپے فی کلو گرام منافع مارجن برقرار رکھتی تھیں۔ حالانکہ حال ہی میں اس مارجن کو گھٹا کر 16 روپے فی کلو گرام کر دیا گیا ہے، جس سے دکانداروں میں شدید غم و غصہ ہے۔

ایسوسی ایشن کے صدر نیلوتلا شیکھر نے کہا کہ چکن کی قیمتوں میں 400-350 روپے کے اضافے سے بھی خوردہ فروشوں کو فائدہ نہیں ہوا۔ ایسوسی ایشن کے ایک نمائندے نے کہا کہ 16 روپے فی کلوگرام کے مارجن پر دکان چلانا جاری رکھنا ناممکن ہے۔ بجلی، کرایہ اور مزدوری کے اخراجات بڑھ رہے ہیں۔ ہم مطالبہ کر رہے ہیں کہ مارجن کو بڑھا کر 30 روپے فی کلوگرام کیا جائے تاکہ موجودہ معاشی حالات کا مقابلہ کیا جا سکے۔ اس ہڑتال سے سپلائی پر بھاری اثر پڑنے کا خدشہ ہے، جس سے بازاروں میں چکن کی کمی ہو سکتی ہے اور قیمتوں میں اضافہ ہو سکتا ہے۔

ایسوسی ایشن کا کہنا ہے کہ جب تک پولٹری کمپنیاں بات چیت کے لیے آگے نہیں آتیں اور ان کے مطالبات پورے کرنے کے لیے کوئی ٹھوس قدم نہیں اٹھاتی ہیں، تب تک ہڑتال جاری رہے گی۔ انہوں نے حکومت سے بڑی پولٹری کمپنیوں اور چھوٹے دکانداروں کے درمیان پیدا ہوئے اس مسئلہ کو حل کرنے کے لیے مداخلت کرنے کا مطالبہ کیا ہے۔