آج پوری انسانیت اخلاقی خرابی کی شکار، قرآن کی رہنمائی سے ہی ملحد اور منافق لوگوں سے نپٹا جا سکتا ہے:علی خامنہ ای

رمضان المبارک کے بابرکت مہینہ کا آغاز پوری دنیا میں تزک و احترام کے ساتھ ہو چکا ہے۔ حالانکہ اس دوران پوری دنیا کی نظریں مشرق وسطیٰ کے حالات پر بھی ٹکی ہوئی ہیں۔ گزشتہ سال مشرقی وسطیٰ کے کئی علاقوں میں زبردست افرا تفری کا ماحول تھا۔ اس علاقے نے فلسطین میں ایک بہت بڑی جنگ اور شام میں دہائیوں پرانی حکومت کے تختہ پلٹ کو دیکھا تھا۔ ان دونوں واقعات کا تعلق ایران سے کسی نہ کسی طور پر ہے۔

حالانکہ رمضان المبارک کے موقع پر ایران میں خوب رونق کا ماحول ہے لیکن ملک پر کئی طرح کی پابندیاں عائد ہیں جس سے اسے زبردست اقتصادی بحران کا سامنا ہے۔ ایران اس وقت کئی چیلنجوں کا ایک ساتھ سامنا کر رہا ہے۔

رمضان کے پہلے دن ایران کے سپریم لیڈر علی خامنہ ای نے ملک میں قرآن پڑھنے والے کئی لوگوں سے ملاقات کی۔ وہیں انہوں نے 'ایکس' پر ایک پوسٹ کرکے سبھی کو رمضان کی مبارک باد بھی دی۔ انہوں نے اپنے پوسٹ میں لکھا، "رمضان کے پاک مہینے کی شروعات پر مبارک باد، جو اصل میں تقویٰ اور شکر کرنے والوں کے لیے ایک خاص عید ہے۔" لوگوں کو مبارک باد دینے کے ساتھ ہی خامنہ ای نے ملک کی خستہ حالت کے لیے کچھ لالچی لوگوں کو ذمہ دار ٹھہرایا جو ملک میں اقتدار کے لیے بھوکے ہیں۔

خامنہ ای نے ایک دیگر پوسٹ میں کہا، "آج ایران کے سامنے اقتدار کے بھوکے لوگوں کا ایک بڑا گروپ ہے، جو یا تو ملحد ہے یا منافق۔ ہمیں ان سے کیسے نپٹنا چاہیے؟ قرآن میں ایسے لوگوں سے نپٹنے کے لیے رہنمائی کی گئی ہے۔" انہوں نے اس بات پر زور دیتے ہوئے عوام سے سے کہا کہ قرآن کے سہارے وہ ملحد، منافق اور اقتدار کے بھوکے لوگوں سے نپٹ سکتے ہیں۔

خامنہ ای نے آگے کہا، "آج پوری انسانیت اخلاقی خرابی کی شکار ہے۔ وہ حسد، کنجوسی، شک، کاہلی، مفاد اور سماج کے مفادات کے اوپر اپنے مفاد کو ترجیح دینے کے عادی ہیں۔ ان سبھی خرابیوں کا علاج قرآن میں دیا گیا ہے۔"