دہلی: ترکمان گیٹ کی درگاہ فیضِ الٰہی مسجد میں نمازِ جمعہ کے پیش نظر سخت سکیورٹی

دہلی پولیس نے وسطی دہلی کے ترکمان گیٹ علاقے میں واقع درگاہ فیضِ الٰہی مسجد کے اطراف نمازِ جمعہ کے پیش نظر سخت سیکورٹی انتظامات نافذ کر دیے ہیں۔ پولیس نے واضح کیا ہے کہ آج کے روز اس مسجد میں عام افراد کو نماز ادا کرنے کی اجازت نہیں دی گئی ہے اور مسجد کے آس پاس کے علاقوں میں لوگوں کے جمع ہونے پر مکمل پابندی عائد رہے گی۔ سکیورٹی انتظامات کو چاک و چوبند قرار دیتے ہوئے پولیس حکام نے کہا ہے کہ فورس پہلے سے ہی علاقے میں مستعد ہے۔

این ڈی ٹی وی کی رپورٹ کے مطابق درگاہ فیضِ الٰہی مسجد کے اطراف پولیس کی بھاری نفری تعینات کی گئی ہے اور ترکمان گیٹ کے آس پاس کی متعدد سڑکوں کو بند کر دیا گیا ہے۔ علاقے میں گزشتہ دو دنوں سے دکانیں بند ہیں اور جمعہ کے روز بھی بازار نہیں کھلے۔ پولیس کو خدشہ ہے کہ نمازِ جمعہ کے موقع پر مقامی افراد بڑی تعداد میں مسجد کی طرف آ سکتے ہیں، اسی لیے آج کا دن انتظامیہ کے لیے نہایت حساس قرار دیا جا رہا ہے۔

این ڈی ٹی وی کے مطابق پولیس نے اس معاملے پر امن کمیٹی کے ارکان کے ساتھ بات چیت بھی کی ہے۔ اس گفت و شنید کے بعد امن کمیٹی کی جانب سے عوام سے اپیل کی گئی ہے کہ آج کے روز لوگ نمازِ جمعہ اپنے گھروں میں ہی ادا کریں۔ امن کمیٹی نے یہ بھی کہا ہے کہ اگر کوئی شخص کسی دوسری مسجد میں نماز پڑھنے کے لیے جائے تو نماز کے فوراً بعد بغیر رکے سیدھا اپنے گھر واپس چلا جائے اور مسجد یا اس کے اطراف میں کسی بھی طرح کے اجتماع سے گریز کرے۔

رپورٹ میں پولیس ذرائع کے حوالہ سے بتایا گیا ہے کہ مسجد کے آس پاس کے علاقوں میں غیر ضروری آمد و رفت پر نظر رکھی جا رہی ہے اور کسی بھی مشتبہ سرگرمی پر فوری کارروائی کے احکامات دیے گئے ہیں۔

خیال رہے کہ مسجد کے اطراف سے تجاوزات ہٹا دی گئی ہیں اور زیادہ تر ملبہ صاف کر دیا گیا ہے، تاہم کچھ مقامات پر لوہے کا ملبہ اب بھی موجود ہے، جسے انتظامیہ کے مطابق آج کے روز مکمل طور پر ہٹا لیا جائے گا۔

رپورٹ میں بتایا گیا ہے کہ ترکمان گیٹ کا علاقہ، جو عام دنوں میں رات گئے تک چہل پہل سے بھرا رہتا تھا، گزشتہ تین دنوں سے غیر معمولی خاموشی کا شکار ہے۔ سڑکوں پر سنّاٹا ہے اور پولیس کی موجودگی نمایاں طور پر دیکھی جا سکتی ہے۔ مقامی باشندوں کے مطابق یہ منظر اس علاقے کے لیے غیر معمولی ہے، جہاں معمول کے دنوں میں کاروباری سرگرمیاں اور آمد و رفت مسلسل جاری رہتی تھیں۔ انتظامیہ کا کہنا ہے کہ حالات پر مسلسل نظر رکھی جا رہی ہے اور عوام کے تعاون سے امن و امان برقرار رکھنے کی کوشش کی جا رہی ہے۔