نائیجیریا میں خوفناک حادثہ، پیٹرول ٹینکر دھماکہ میں 70 افراد کی موت، 50 زخمی

شمالی نائیجیریا میں خوفناک حادثہ پیش آیا ہے۔ یہاں ایک پٹرول ٹینکر اُلٹ گیا، جس سے ایندھن پھیلنے کے بعد زوردار دھماکہ ہو گیا۔ اس دھماکہ میں کم سے کم 70 لوگوں کے ہلاک ہونے کی خبر ہے۔ ایک رپورٹ کے مطابق 70 سے زیادہ لوگوں کی لاش برآمد کر لی گئی ہے جبکہ 50 افراد زخمی ہیں۔ اس دھماکہ میں 15 سے زیادہ دکانیں تباہ ہو گئی ہیں۔ ملک کی ایمرجنسی ریسپانس ایجنسی کے مطابق یہ حادثہ ہفتہ کو نائجر صوبہ کے سلیجا علاقے کے قریب اس وقت پیش آیا جب کچھ لوگ جنریٹر کا استعمال کرکے ایک ٹینکر سے دوسرے ٹرک میں گیسولین منتقل کرنے کی کوشش کر رہے تھے۔

نیشنل ایمرجنسی مینجمنٹ ایجنسی نے حادثے پر اپنے بیان میں کہا ہے کہ زخمیوں کو علاج کے لیے اسپتالوں میں لے جایا جا رہا ہے، ان کے علاج کے لیے ہر ممکن کوشش جاری ہے۔ حسینی عیسیٰ نے بتایا کہ فیول منتقل کرنے کی وجہ سے دھماکہ ہوا، جس کے بعد گیسو لین منتقل کرنے والے اور اس کے آس پاس کھڑے لوگ اس کی زد میں آ گئے۔

نائجر ریاست کے یونین روڈ سیفٹی کے کور سیکٹر کمانڈر کمار سُکوام نے بھی اس معاملے میں اپنا بیان درج کرایا ہے۔ انہوں نے کہا کہ روکنے کی پوری کوشش کے باوجود ایندھن لینے کے لیے لوگوں کی بڑی بھیڑ جمع ہو گئی۔ سُکوام نے کہا کہ فائر بریگیڈ کے اہلکاروں نے بڑی مشقت کے بعد آگ پر قابو پانے میں کامیابی حاصل کر لی لیکن تب تک کئی لوگوں کی جان چلی گئی۔

غور طلب ہے کہ افریقہ کے سب سے بڑے تیل پیداوار ملک میں ایسے حادثات عام ہو گئے ہیں۔ اس کی زد میں آنے سے اب تک کئی لوگوں کی جان جا چکی ہے۔ نائجر ریاست میں یہ حادثہ گزشتہ اکتوبر میں جگاوا ریاست میں اسی طرح کے دھماکہ کے بعد ہوا ہے۔ اس حادثے میں بھی 147 لوگوں کی جان چلی گٓئی تھی، یہ نائجیریا میں سب سے بدترین سانحات میں سے ایک تھا۔ معلوم ہو کہ گزشتہ مئی 2023 میں صدر بولا ٹینوبو کے دفتر میں آنے پر دہائیوں پرانی سبسیڈی ختم کرنے کے بعد سے نائجیریا میں پٹرول کی قیمت 400 فیصد سے زیادہ بڑھ گئی ہے۔