غزہ میں جان بحق فلسطینی بچوں کی تعداد 18 ہزار سے متجاوز، مجموعی 62 ہزار سے زائد

غزہ پر اسرائیلی فوج کی مسلسل جارحیت کے نتیجے میں انسانی المیہ اپنی انتہا کو پہنچ گیا ہے۔ سرکاری اعداد و شمار کے مطابق 7 اکتوبر 2023 سے جاری حملوں میں جان بحق ہونے والے فلسطینی بچوں کی تعداد 18 ہزار 885 ہو گئی ہے۔ مجموعی طور پر جان گنوانے والے فلسطینیوں کی تعداد 62 ہزار سے زیادہ ہو چکی ہے، جن میں خواتین اور بزرگ بھی شامل ہیں۔

غزہ کے سرکاری میڈیا آفس کی جانب سے جاری رپورٹ میں کہا گیا ہے کہ تقریباً دو سال سے جاری اسرائیلی کارروائیوں نے غزہ کی سرزمین کو کھنڈر میں بدل دیا ہے۔ مسلسل بمباری کے باعث نہ صرف رہائشی عمارتیں بلکہ ہسپتال، اسکول، مساجد اور بازار بھی ملبے کا ڈھیر بن چکے ہیں۔ بچے جو عام طور پر زندگی اور مستقبل کی علامت سمجھے جاتے ہیں، سب سے زیادہ نشانہ بن رہے ہیں۔

فلسطینی پناہ گزینوں کے لیے اقوام متحدہ کی ایجنسی (یو این آر ڈبلیو اے) نے اپنی رپورٹ میں کہا ہے کہ غزہ میں اب کوئی جگہ بچوں کے لیے محفوظ نہیں رہی۔ اسرائیل کی طرف سے اشد ضروری انسانی امداد اور طبی سامان کی ناکہ بندی نے صورتحال کو مزید سنگین بنا دیا ہے۔ ادارے کے مطابق، خوراک اور دوائیوں کی شدید قلت کی وجہ سے ہزاروں بچے بھوک اور بیماریوں کا شکار ہو رہے ہیں۔

یو این آر ڈبلیو اے کا کہنا ہے کہ اسرائیلی بمباری کے دوران اقوام متحدہ کے زیر انتظام اسکول لاکھوں افراد کے لیے پناہ گاہوں کا کام کر رہے تھے لیکن اب یہ پناہ گاہیں بھی بمباری کا نشانہ بن چکی ہیں۔ نتیجتاً بے گھر ہونے والے فلسطینی، بالخصوص بچے اور خواتین، شدید خطرے میں ہیں۔

یونیسیف نے اپنی رپورٹ میں بتایا ہے کہ اسرائیل کی جانب سے یکطرفہ جنگ بندی معاہدوں کی خلاف ورزی اور حملوں کے دوبارہ آغاز کے بعد گزشتہ پانچ ماہ میں ہر ماہ اوسطاً 540 سے زائد بچے جان بحق ہوئے ہیں۔ یہ اعداد و شمار اس بات کی نشاندہی کرتے ہیں کہ فلسطینی بچوں کی زندگیاں کسی بھی عالمی دباؤ یا اپیل کے باوجود محفوظ نہیں۔

عالمی برادری کی جانب سے بارہا انتباہات دیے گئے ہیں کہ اسرائیلی افواج شہری آبادی، اسپتالوں اور امدادی مراکز کو نشانہ نہ بنائیں، لیکن اس کے باوجود حملوں میں تیزی آ رہی ہے۔ حالیہ دنوں میں غزہ شہر میں امدادی مراکز پر بڑی تعداد میں فلسطینی جان بحق ہوئے، جن میں بچوں کی اکثریت شامل تھی۔

انسانی حقوق کے عالمی ادارے اور کئی ممالک کی حکومتیں اسرائیل کو بین الاقوامی قوانین کی پاسداری کی یاد دہانی کرا رہے ہیں۔ ماہرین کا کہنا ہے کہ اگر فوری اور پائیدار جنگ بندی نہ ہوئی تو غزہ میں بچوں کی نسل کشی کی سنگین مثال دنیا کے سامنے آئے گی۔

اس وقت غزہ کے بیشتر ہسپتال بند پڑے ہیں یا جزوی طور پر کام کر رہے ہیں۔ ایندھن کی قلت، طبی آلات کی تباہی اور ڈاکٹروں کی ہلاکت یا ہجرت نے طبی نظام کو مفلوج کر دیا ہے۔ ایسے حالات میں زخمی بچوں کو بروقت طبی امداد نہ ملنے کے باعث ہلاکتوں میں مزید اضافہ ہو رہا ہے۔

غزہ کے عوام عالمی برادری سے مطالبہ کر رہے ہیں کہ وہ اسرائیل پر دباؤ ڈالے تاکہ بمباری بند ہو، ناکہ بندی ختم ہو اور انسانی بنیادوں پر امداد کی فراہمی کو یقینی بنایا جائے۔

(مآخذ: یو این آئی)