وینزویلا کے بعد میکسیکو بھی ٹرمپ کے نشانے پر، ڈرگ کارٹیل کے خلاف حملے کی دھمکی

امریکہ کے صدر ڈونالڈ ٹرمپ ایک بار پھر سخت بیانات اور جارحانہ حکمت عملی کے باعث عالمی توجہ کا مرکز بن گئے ہیں۔ وینزویلا میں فوجی کارروائی کے بعد اب ان کی توجہ میکسیکو کی طرف مبذول ہو گئی ہے، جہاں انہوں نے ڈرگ کارٹیل (غیر ریاستی منشیات اسمگلنگ نیٹ ورک) کے خلاف براہ راست حملے کی دھمکی دی ہے۔ ٹرمپ کا کہنا ہے کہ میکسیکو کے ذریعے امریکہ میں منشیات اور غیر قانونی تارکین وطن کی آمد ایک سنگین مسئلہ بن چکی ہے، جسے کسی بھی صورت نظرانداز نہیں کیا جا سکتا۔

گزشتہ ہفتے امریکہ نے وینزویلا میں کارروائی کرتے ہوئے صدر نکولس مادورو کو راجدھانی کراکاس میں ان کے کمپاؤنڈ سے حراست میں لینے کا دعویٰ کیا تھا۔ اس اقدام کے بعد خطے میں شدید ردعمل دیکھنے میں آیا اور کئی ممالک نے اسے علاقائی استحکام کے لیے خطرہ قرار دیا۔ اسی تناظر میں اب ٹرمپ کے حالیہ بیانات نے میکسیکو اور لاطینی امریکہ میں تشویش کی لہر دوڑا دی ہے۔

ٹرمپ نے میکسیکو پر الزام عائد کیا کہ وہاں کے ڈرگ کارٹیل نہ صرف منشیات کی اسمگلنگ میں ملوث ہیں بلکہ وہ امریکہ میں تشدد اور جرائم کے پھیلاؤ کا بھی سبب بن رہے ہیں۔ ان کے مطابق ستمبر 2025 کے بعد سے امریکہ نے کیریبین میں کم از کم 35 مشتبہ کارٹیل کشتیوں کو نشانہ بنایا ہے، جس سے سمندری راستوں سے آنے والی منشیات میں نمایاں کمی آئی ہے۔ انہوں نے دعویٰ کیا کہ اب زمینی راستوں سے اسمگلنگ کے خلاف بھی بھرپور کارروائی کی جائے گی۔

فاکس نیوز کو انٹرویو دیتے ہوئے ٹرمپ نے کہا کہ میکسیکو عملی طور پر کارٹیل کے کنٹرول میں ہے اور وہاں کی صورت حال انتہائی افسوس ناک ہے۔ ان بیانات کے جواب میں میکسیکو کی صدر کلاڈیا شینبام نے کہا کہ ٹرمپ کے بیانات ان کے مخصوص اندازِ گفتگو کا حصہ ہیں، تاہم میکسیکو اپنی خودمختاری پر کوئی سمجھوتہ نہیں کرے گا۔

شینبام نے بتایا کہ انہوں نے وزیر خارجہ جوآن رامون دے لا فوئنٹے کو ہدایت دی ہے کہ وہ امریکی وزیر خارجہ مارکو روبیو سے رابطہ کریں اور ضرورت پڑنے پر براہ راست ٹرمپ سے بات کر کے تعاون کے امکانات پر گفتگو کریں۔ اس سے قبل میکسیکو نے وینزویلا میں امریکی کارروائی پر تنقید کرتے ہوئے اسے پورے خطے کے لیے خطرناک مثال قرار دیا تھا۔