افغانستان: امریکی ہیلی کاپٹر گر کر تباہ، 2 اہلکار ہلاک، طالبان نے لی ذمہ داری

کابل: افغانستان میں بدھ کے روز ہوئے ایک ہیلی کاپٹر حادثے میں دو امریکی فوجی ہلاک ہوگئے۔ ناٹو کی قیادت والی اتحاد نے اس کی تصدیق کی ہے۔ امریکی فورسز نے بتایا کہ حادثے کی وجوہات جاننے کے لیے تحقیقات شروع کر دی ہے لیکن ابتدائی طور پر ایسے کوئی شواہد نہیں ملے جس سے لگتا ہو کہ ہیلی کاپٹر کو دشمن نے تباہ کیا۔ دوسری جانب افغان طالبان نے ہیلی کاپٹر کو تباہ کرنے کی ذمہ داری قبول کرتے ہوئے بتایا ہے کہ ہیلی کاپٹر کو افغانستان کے صوبے لوگر میں تباہ کیا گیا۔

فوج کے مختصر بیان میں ہلاک شدگان کے سلسلے میں کوئی تفصیل نہیں دی گئی ہے۔ صرف اتنا کہا گیا ہے کہ امریکی دفاعی محکمے کے مطابق، کارروائی میں ہلاک ہونے والے فوج کے جوانوں کے ناموں کی تفصیل ان کے گھر والوں کومطلع کرنے کے 24 گھنٹے بعد تک روکی جا رہی ہے۔ اسی دوران، افغان حکومت اور اتحاد سے لڑنے والے طالبان عسکریت پسند گروپ نے دعوی کیا ہے کہ باغیوں نے مشرقی صوبہ لوگر میں ایک چنوک ہیلی کاپٹر پرحملہ کیا تھا۔

طالبان کے ترجمان ذبیح اللہ مجاہد نے ٹوئٹر پر لکھا ہے کہ امریکی ہیلی کاپٹر نے لوگر کے ضلع چرخ کے علاقے پانگرام میں ان کے ٹھکانے پرحملہ کرنے کی کوشش کی تھی۔ اکتوبر 2017 میں ، لوگر میں اتحادی ہیلی کاپٹر گرنے کے نتیجے میں ایک امریکی اہلکار ہلاک اور چھ امریکی فوجی زخمی ہوگئے تھے۔

افغانستان کی وزارت دفاع کی جانب سے بھی اس حوالے سے جاری بیان میں کہا گیا ہے کہ ابتدائی طور پر ایسے کوئی شواہد نہیں ملے ہیں کہ ہیلی کاپٹر کو طبالبان نے تباہ کیا ہے اور نا ہی ہیلی کاپٹر حادثے میں کوئی افغان اہلکار زخمی ہوا ہے۔ خیال رہے کہ گزشتہ روز ہی افغانستان نے دو غیر ملکی پروفیسرز کی رہائی کے بدلے تین طالبان رہنماؤں کو رہا کیا تھا۔