افغانستان: مزار شریف کی مسجد میں دھماکہ، 20 افراد جاں بحق، 65 زخمی

کابل: افغانستان کے شہر مزار شریف میں دھماکہ کی اطلاع موصول ہوئی ہے۔ دھماکہ میں متعدد افراد کے جان بحق اور زخمی ہونے کی خبر ہے۔ ٹی آر ٹی ورلڈ نے مقامی طالبان کمانڈر کے حوالہ سے بتایا کہ شمالی افغانستان کے شہر مزار شریف میں ایک شیعہ مسجد میں ہونے والے دھماکے میں کم از کم 20 افراد ہلاک یا زخمی ہو گئے ہیں۔

افغان میڈیا نے بتایا کہ محکمہ صحت کے حکام کے مطابق بیشتر زخمیوں کی حالت تشویش ناک ہے اور اموات کی تعداد میں اضافے کا امکان ہے۔ مزار شریف میں طالبان کمانڈر کے ترجمان محمد آصف وزیر نے رائٹرز کو بتایا کہ "دوسرے ضلع میں ایک شیعہ مسجد کے اندر ایک دھماکہ ہوا، جس میں 20 سے زائد افراد ہلاک اور زخمی ہوئے۔"

خیال رہے کہ افغانستان میں طالبان کے اقتدارسنبھالنے کے بعد سے خونریزی کا سلسلہ کم ہو گیا تھا، تاہم دولت اسلامیہ کی جانب سے کچھ حملہ ضرور کئے گئے۔ تاہم اب کچھ دنوں سے حملوں کا سلسلہ تیز ہو رہا ہے۔ حال ہی میں 19 اپریل کو کابل کے قریب ایک اسکول تین دھماکوں سے لرز اٹھا تھا۔ دھماکوں کے سبب چھ لوگوں کی موت واقع ہوئی تھی۔ جبکہ درجن بھر لوگ زخمی ہو گئے تھے۔ یہ دھماکے کابل کے قریب عبدالرحیم شاہد ہائی اسکول میں ہوئے تھے۔