ٹرمپ کا اقدام، 4 ممالک کے 5.3 لاکھ تارکین وطن امریکہ سے ہوں گے بے دخل

امریکی صدر ڈونالڈ ٹرمپ غیر قانونی تارکین وطن پر لگاتار اپنی کارروائی تیز کیے ہوئے ہیں۔ اس سلسلے میں اب 530000 غیر ملکی لوگوں کے لیے خطرے کی گھنٹی بج گئی ہے۔ دراصل ڈونالڈ ٹرمپ انتظامیہ نے جمعہ کو اعلان کیا ہے کہ وہ ریاستہائے متحدہ امریکہ میں کیوبا، ہیتی، نکاراگوا اور وینوزویلا کے قانونی تحفظ کو منسوخ کرے گا۔ اس فیصلے کے عمل میں آتے ہی ان ملکوں کے ممکنہ طور پر پانچ لاکھ تیس ہزار لوگوں کو تقریباً ایک مہینے کے اندر امریکہ چھوڑنا پڑ سکتا ہے۔

واضح رہے کہ ان چار ممالک کے تارکین وطن 2022 میں فائنانشیل اسپانسر کے ساتھ ریاستہائے متحدہ امریکہ میں آئے تھے۔ انہیں امریکہ میں رہنے اور کام کرنے کے لیے دو سال کا پرمٹ دیا گیا تھا۔ اب ہوم لینڈ تحفظ محکمہ نے اعلان کیا ہے کہ ایسے لوگ 24 اپریل کو وفاقی رجسٹر میں نوٹس شائع ہونے کے 30 دن بعد اپنے لیگل اسٹیٹس کو گنوا دیں گے۔

مانا جا رہا ہے کہ اس فیصلے کا وسیع اثر دیکھنے کو مل سکتا ہے۔ سابق صدر جو بائیڈن کی مدت کار میں ان تارکین وطن کو دو سال کی پیرول دی گئی تھی۔ جو اب موثر طور سے ختم ہو گئی ہے۔ چاروں ملکوں کے شہریوں کو امریکی اسپانسر کے ساتھ ہوائی راستے سے امریکہ میں داخل ہونے کی اجازت ملی تھی۔

انسانی پیرول سسٹم طویل عرصے سے چلا آ رہا ہے، یہ ایک لیگل سسٹم ہے، جس کا استعمال صدرجمہوریہ ان ملکوں کے لوگوں کو اجازت دینے کے لیے کرتے ہیں جہاں جنگ یا سیاسی عدم استحکام ہے۔ ایسے میں یہ لوگ امریکہ میں داخل کر سکتے ہیں اور عارضی طور سے رہ سکتے ہیں۔ ٹرمپ انتظامیہ نے اس سسٹم میں بڑے پیمانے پر غلط اسعمال کا الزام لگائے ہوئے اسے ختم کرنے کا فیصلہ کیا ہے۔

نیوز ایجنسی کے مطابق ہوم لینڈ سیکوریٹی ڈپارٹمنٹ نے کہا ہے کہ امریکہ میں رہنے کے لیے جائز بنیاد کے بغیر یعنی پیرول پر آئے لوگوں کو اپنی پیرول ختم ہونے کی تاریخ سے پہلے امریکہ چھوڑ دینا چاہیے۔ ٹرمپ انتظامیہ کے ذریعہ پانچ لاکھ تارکین وطن کا لیگل اسٹیٹس منسوخ کرنے کے فیصلہ سے کئی لوگوں کو ملک بدر کرنے کا سامنا کرنا پڑ سکتا ہے۔ حالانکہ یہ واضح نہیں ہے کہ پیرول پروگرام کے تحت امریکہ میں داخل ہونے والے کتنے لوگوں نے تب سے تحفظ یا لیگل اسٹیٹس کے آپشن حاصل کیے ہیں۔

2022 میں اس وقت کے صدر جو بائیڈن نے وینوزویلا کے لوگوں کے لیے پیرول اِنٹری پروگرام شروع کیا تھا۔ بعد میں 2023 میں اس کی توسیع کی گئی اور کیوبا، ہیتی اور نکارگوا کے لوگوں کو شامل کیا گیا۔ ریاستہائے متحدہ امریکہ اور ان چار ملکوں کے درمیان سفارتی اور سیاسی تعلقات کشیدہ بنے ہوئے ہیں۔