لارڈس ٹیسٹ: آئی سی سی نے محمد سراج کے خلاف کی کارروائی، میچ کھیلنے پر پابندی کا خطرہ لاحق

انگلینڈ اور ہندوستان کے درمیان کھیلے جا رہے تیسرے ٹیسٹ میچ میں آئی سی سی نے محمد سراج کو ضابطہ اخلاق کی خلاف ورزی پر سخت سزا دی ہے۔ آئی سی سی نے محمد سراج کے میچ فیس کا 15 فیصد کاٹ لیا ہے، ساتھ ہی انہیں ایک ڈی میرٹ پوائنٹ بھی دیا ہے۔ اب محمد سراج کے کھاتے میں 2 ڈی میرٹ پوائنٹ ہو گئے، آئندہ 2 سالوں تک میچ کھیلنے پر پابندی کا بڑا خطرہ لاحق رہے گا۔ اگر اگلے ایک سال میں محمد سراج کے کھاتہ میں 2 اور ڈی میرٹ پوائنٹ جڑتے ہیں تو ان پر پابندی عائد ہو سکتی ہے۔

واضح ہو کہ آئی سی سی کے قوانین کے مطابق اگر کسی بھی کھلاڑی کو لیول 1 کا قصوروار پایا جائے تو اسے 2-1 ڈی میرٹ پوائنٹ ملتے ہیں۔ اگر یہ ڈی میرٹ پوائنٹ 4-3 ہو جاتے ہیں تو اس کھلاڑی پر ایک ٹیسٹ، 2 ونڈے یا 2 ٹی-20 میچ کھیلنے پر پابندی عائد کی جا سکتی ہے۔ اس کا واضح مطلب یہ ہوا کہ اگر محمد سراج نے دوبارہ لارڈس ٹیسٹ جیسی غلطی کی تو انہیں میچ کی پابندی کا سامنا کرنا پڑ سکتا ہے، ساتھ ہی میچ فیس میں بھی تخفیف کر دی جائے گی۔

محمد سراج کو آئی سی سی نے یہ سزا انگلینڈ کے سلامی بلے باز بین ڈکیٹ سے تصادم کی وجہ سے دی ہے۔ دراصل لارڈس ٹیسٹ میچ کی دوسری اننگ میں بین ڈکیٹ کو آؤٹ کرنے کے بعد محمد سراج بہت زیادہ جارحانہ ہو گئے تھے۔ محمد سراج، بین ڈکیٹ کے منہ پر زور زور سے چلانے لگے اور ساتھ ہی ان کو کندھا بھی مارا، جس کے بعد میچ ریفری نے ان کے خلاف کارروائی کی۔ تیسرے ٹیسٹ میچ میں محمد سراج کے ساتھ ساتھ کپتان شبھمن گل بھی کافی جارح نظر آئے ہیں، حالانکہ ان کے خلاف اب تک کسی بھی قسم کی کارروائی کی کوئی خبر نہیں آئی ہے۔