پہلا ٹیسٹ: جسپریت بمراہ کا شاندار پنجہ، جنوبی افریقہ پہلی اننگز میں 159 رنز پر ڈھیر

کولکاتا میں کھیلے جا رہے پہلے ٹیسٹ میں ہندوستانی رفتار کے جادوگر جسپریت بمراہ نے تباہ کن بولنگ سے میچ کا نقشہ بدل دیا۔ ان کی دھواں دار گیندبازی کے آگے جنوبی افریقی بیٹنگ لائن زیادہ دیر کھڑی نہ رہ سکی اور پوری ٹیم پہلی اننگز میں محض 159 رنز پر ڈھیر ہو گئی۔ ٹاس جیت کر پہلے بلے بازی کا فیصلہ کرنا جنوبی افریقہ کے لیے ناکام ثابت ہوا اور شروعات کے بعد جیسے ہی پہلا جھٹکا لگا، وکٹوں کا سلسلہ رکنے کا نام نہیں لے رہا تھا۔

جنوبی افریقہ نے اننگز کا آغاز پُراعتماد انداز میں کیا۔ اوپنرز ایڈن مارکرام اور رائن رکیلٹن نے ابتدائی 10.3 اووروں میں 57 رنز کی مضبوط شراکت قائم کی۔ دونوں بیٹرز نے انڈین تیز گیندبازوں کو ابتدا میں سنبھل کر کھیلتے ہوئے ایک اچھا پلیٹ فارم دیا لیکن یہ سلسلہ زیادہ دیر جاری نہیں رہ سکا۔ رکیلٹن 22 گیندوں پر 23 رنز بنانے کے بعد جسپریت بمراہ کی باہر جاتی ہوئی گیند پر کیچ آؤٹ ہوئے، اور اسی سے جنوبی افریقہ کی مشکلات کا آغاز ہوگیا۔

پہلی وکٹ گرنے کے بعد ہندوستانی گیندبازوں نے دباؤ بڑھایا اور 71 کے مجموعے تک مہمان ٹیم کے تین اہم بیٹرز پویلین لوٹ چکے تھے۔ بمراہ نے اپنی رفتار، نپی تلی لائن اور مسلسل سوئنگ سے بیٹرز کو پریشان رکھا، جبکہ دوسری طرف اسپن محاذ پر کلدیپ یادو نے ٹیم کو بروقت کامیابیاں دلائیں۔

مڈل آرڈر میں ٹوئی ڈی زورزی اور ویان مُلڈر نے کچھ مزاحمت دکھائی۔ دونوں نے 83 گیندوں پر 43 رنز کی پارٹنرشپ کی لیکن یہ کوشش بھی انڈین بولنگ کے سامنے زیادہ دیر قائم نہ رہ سکی۔ ملڈر 24 رنز اور ڈی زورزی بھی 24 رنز بنا کر آؤٹ ہوئے۔

اس کے بعد جنوبی افریقہ کی بیٹنگ لائن بکھر گئی۔ کائل ورین نے 16 رنز جوڑے جبکہ ٹرِسٹن اسٹبز 15 رنز کے ساتھ ناٹ آؤٹ رہے۔ جنوبی افریقہ کے پانچ بیٹرز دُہائی کا ہندسہ بھی نہ چھو سکے، جو ہندوستانی بولنگ کے تسلسل اور منصوبہ بندی کا ثبوت تھا۔

بھارت کی جانب سے اس اننگز کے ہیرو جسپریت بمراہ رہے، جنہوں نے 14 اووروں میں صرف 27 رنز دے کر 5 وکٹیں حاصل کیں۔ جنوبی افریقہ کے خلاف یہ ان کا دوسرا بہترین ٹیسٹ اسپیل ہے۔ اس سے قبل وہ 2024 میں کیپ ٹاؤن ٹیسٹ میں 61 رنز دے کر 6 وکٹیں لے چکے ہیں۔ ان کی آج کی کارکردگی نے ہندوستانی فیلڈرز اور تماشائیوں میں زبردست جوش پیدا کر دیا۔

ان کے علاوہ محمد سراج اور کلدیپ یادو نے دو، جبکہ اکشر پٹیل نے ایک وکٹ حاصل کی۔ ہندوستانی بولنگ اٹیک نے جنوبی افریقہ کو کبھی اپنی حکمت عملی پر دوبارہ جمع ہونے کا موقع نہیں دیا۔ اس میچ میں رشبھ پنت کی ٹیم میں واپسی بھی نمایاں رہی۔ انہوں نے وکٹ کے پیچھے بہترین ردعمل دکھاتے ہوئے اہم کیچ پکڑے۔ ان کے ساتھ نوجوان وکٹ کیپر دھروو جرّیل کو بھی پلیئنگ الیون میں شامل کیا گیا ہے۔

ہندوستانی ٹیم حال ہی میں ویسٹ انڈیز کے خلاف 2-0 کی ٹیسٹ سیریز جیت کر آئی ہے، اور شائقین کو امید ہے کہ یہ سلسلہ جنوبی افریقہ کے خلاف بھی برقرار رہے گا۔ دونوں ٹیموں کے درمیان دوسرا ٹیسٹ 22 نومبر سے گواہاٹی میں شروع ہوگا۔