چمپئنز ٹرافی سے قبل ہندوستانی ٹیم کو ملی بُری خبر، انگلینڈ کے خلاف آخری وَنڈے بھی نہیں کھیلیں گے بمراہ

آئندہ 6 فروری سے ہندوستان اور انگلینڈ کے درمیان 3 میچوں کی یک روزہ سیریز شروع ہو رہی ہے۔ یہ سیریز ’چمپئنز ٹرافی 2025‘ سے قبل ٹیم کی مضبوطی کا اندازہ لگانے کے لیے بہترین موقع ہے۔ امید کی جا رہی تھی کہ ہندوستان کے تیز گیندباز جسپریت بمراہ اس سیریز کے آخری میچ میں حصہ لیں گے، لیکن انگلینڈ کے خلاف آخری ونڈے کے لیے جو اسکواڈ سامنے آیا ہے، اس میں بمراہ کا نام شامل نہیں ہے۔ اس خبر نے ہندوستانی ٹیم اور کرکٹ شیدائیوں کو فکر مند کر دیا ہے۔ سوال یہ اٹھنے لگا ہے کہ کیا بمراہ چمپئنز ٹرافی میں کھیلنے کے لیے دستیاب ہوں گے؟

قابل ذکر ہے کہ جسپریت بمراہ کو آسٹریلیا دورے پر آخری میچ کے دوران چوٹ لگ گئی تھی۔ اس کے بعد انھیں آرام کرنے کا مشورہ دیا گیا تھا۔ جب چمپئنز ٹرافی اور انگلینڈ کے خلاف وَنڈے سیریز کے لیے ہندوستانی ٹیم کا اعلان کیا گیا تھا تو پریس کانفرنس میں اجیت اگرکر نے امید ظاہر کی تھی کہ آخری میچ تک وہ صحت مند ہوئے تو کھیلتے نظر آئیں گے۔ اب جبکہ ونڈے سیریز سے متعلق بی سی سی آئی کی طرف سے پریس ریلیز جاری کی گئی ہے، تو اس میں بمراہ کا نام شامل نہیں ہے۔ ہندوستانی اسکواڈ میں ’سبجیکٹ ٹو فٹ نس‘ کے طور پر بھی بمراہ کا نام شامل نہیں کیا گیا ہے۔ یعنی وہ انگلینڈ کے خلاف کھیلنے نہیں اتریں گے۔

غور کرنے والی بات یہ ہے کہ جسپریت بمراہ کی چوٹ سے متعلق کوئی اپڈیٹ بھی نہیں دی گئی ہے۔ یہی وجہ ہے کہ کرکٹ شیدائی کی فکر میں اضافہ ہو گیا ہے۔ بمراہ کے بغیر ہندوستان کی تیز گیندبازی کمزور ہی نظر آتی ہے۔ محمد سمیع تجربہ کار گیندباز ضرور ہیں، لیکن وہ بھی چوٹ سے ٹھیک ہو کر عرصہ بعد بین الاقوامی یک روزہ کرکٹ کھیلیں گے۔ ٹی-20 میں انھوں نے انگلینڈ کے خلاف 2 میچ کھیلے ہیں، اس میں ان کی پرانی دھاردار گیندبازی دیکھنے کو نہیں ملی ہے۔