سونے اور چاندی کی قیمتوں میں مسلسل کمی، خریداروں کے لیے خوشخبری

ملک میں قیمتی دھاتوں کے بازار میں نرمی کا رجحان برقرار ہے۔ سونا اور چاندی دونوں کی قیمتوں میں کمی سے زیورات کے خریداروں اور سرمایہ کاروں کے چہروں پر خوشی جھلک رہی ہے۔ انڈیا بلین اینڈ جیولرز ایسوسی ایشن (آئی بی جے اے) کے تازہ اعداد و شمار کے مطابق، 24 قیراط کے سونے کی قیمت میں 441 روپے فی 10 گرام کی کمی ریکارڈ کی گئی ہے، جبکہ چاندی کے داموں میں بھی 2000 روپے فی کلو تک کی گراوٹ دیکھی گئی ہے۔

تفصیلات کے مطابق، 24 قیراط سونا جو پہلے 1,21,518 روپے فی 10 گرام کی قیمت پر دستیاب تھا، اب گھٹ کر 1,21,077 روپے فی 10 گرام رہ گیا ہے۔ اسی طرح، 22 قیراط سونا 1,11,310 روپے سے کم ہو کر 1,10,907 روپے فی 10 گرام پر پہنچ گیا ہے۔ 18 قیراط سونا جو پہلے 91,139 روپے فی 10 گرام تھا، اب 90,809 روپے فی 10 گرام میں دستیاب ہے۔

سونے کے ساتھ ساتھ چاندی کی قیمت میں بھی نمایاں کمی دیکھنے کو ملی ہے۔ پہلے چاندی 1,47,033 روپے فی کلو کے حساب سے فروخت ہو رہی تھی، جو اب گھٹ کر 1,45,031 روپے فی کلو رہ گئی ہے۔ اس طرح چاندی کے نرخوں میں 2,002 روپے کی کمی درج کی گئی۔

انڈیا بلین اینڈ جیولرز ایسوسی ایشن روزانہ دو بار — دوپہر 12 بجے اور شام 5 بجے — تازہ دام جاری کرتی ہے۔ ماہرین کے مطابق قیمتوں میں اس کمی کا سبب عالمی منڈی میں استحکام، جغرافیائی کشیدگی میں کمی اور طلب میں نرمی ہے۔

ایل کے پی سکیورٹیز کے تجزیہ کار جتن تریویدی کا کہنا ہے کہ ’’سونے کی قیمتوں میں کمزوری جاری ہے اور دن کے دوران ایم سی ایکس پر سونا تقریباً 1,550 روپے سستا ہوا۔ عالمی غیر یقینی صورتحال میں کمی اور گھریلو طلب میں کمی نے قیمتی دھاتوں کے بازار پر اثر ڈالا ہے۔‘‘ ان کے مطابق، آنے والے دنوں میں سونے کے لیے 1,19,500 روپے فی 10 گرام ایک مضبوط سپورٹ لیول ہوگا، جبکہ 1,24,500 روپے فی 10 گرام پر ٹھہراؤ دیکھا جا سکتا ہے۔

بین الاقوامی منڈی میں بھی یہی رجحان برقرار ہے۔ خبر لکھے جانے تک، نیویارک کے کومیکس ایکسچینج پر سونا 2.07 فیصد کی گراوٹ کے ساتھ 4,050.65 امریکی ڈالر فی اونس پر تجارت کر رہا تھا، جبکہ چاندی کی قیمت 2.33 فیصد گھٹ کر 47.45 امریکی ڈالر فی اونس رہ گئی۔

ماہرین کا کہنا ہے کہ اگر عالمی معیشت میں استحکام برقرار رہا اور سرمایہ کار خطرے سے دور رہنے کی حکمتِ عملی اپناتے رہے تو سونا اور چاندی دونوں کی قیمتوں میں مزید کمی کا امکان ہے۔ تاہم، تہواروں کے موسم میں زیورات کی مانگ بڑھنے سے وقتی طور پر قیمتوں میں معمولی بہتری بھی دیکھی جا سکتی ہے۔